Уйғур елидә барғанчә көпийиватқан сәргәрдан балилар йәнә диққәт қозғиди

Хитайниң уйғур аптоном район даирилири қурушқа башлиған сәргәрдан балилар мәркизигә орунлаштуруш алдидики қорумиға йәтмигән 20 миң сәргәрдан бала һәққидики хәвәр уйғур вәзийитини көзәткүчиләрниң диққитини қозғиди.
Мухбиримиз меһрибан
2012-11-29
Елхәт
Пикир
Share
Принт

Сәргәрдан балилар мәсилиси һәққидә тохталған көзәткүчиләр уйғур елидики сәргәрдан балиларниң әмәлийәттә буниңдинму көп болуши мумкинликини билдүрүп, бу мәсилә уйғурларниң иқтисади, иҗтимаий орниниң төвән һаләттә туруватқанлиқиниң конкрет ипадилириниң бири икәнликини билдүрди.

Хитай һөкүмәт ахбаратлирида бултурдин башлап хитай өлкилири вә үрүмчи қатарлиқ шәһәрләрдики сәргәрдан балиларни йиғиш хизмитини башлиғанлиқи хәвәр қилинған болсиму, әмма бу балиларниң конкрет сани җәмийәттин йошуруп келингән болуп, бүгүнгичә елан қилинмиған иди.

Һалбуки, уйғур елидә барғанчә еғирлишиватқан сәргәрдан балилар мәсилиси йеқинқи йиллардин буян уйғур тор бекәтлиридә җиддий муназирә темилириниң биригә айланған. Хәлқ арисида сәргәрдан балиларни қутқузуш тәшәббуслири күчийип, нуртай һаҗим, садиқ һаҗим қатарлиқ уйғур сахавәтчилири қурған йетимләр мәктәплири көпәйгән болсиму, әмма уйғур аптоном район даирилириниң сәргәрдан балилар мәсилисини һәл қилишта үнүмлүк тәдбир алмаслиқи әйибләшкә учриған иди.

2009-Йили үрүмчидә йүз бәргән 5- июл үрүмчи вәқәсидин кейин болса, сәргәрдан балилар мәсилисини оттуриға қойған вә уйғурларға қаритилған баравәрсиз сиясәтни тәнқид қилған уйғурбиз, диярим қатарлиқ уйғур тор бекәтлири буйруқ билән тақалған иди.

Пикирләр (0)
Share
Толуқ бәт