Мухбиримиз үмидвар
2009-11-22
Китабта өткән әсирниң 20 - 30 - йиллирида қошна оттура асия районида совет русийиси билән қаршилишип, вәтинини тәрк әткән өзбек, таҗик, қирғиз, рус, қазақ вә башқа хәлқләрниң вәкиллириниң уйғур диярида елип барған паалийәтлиридин башқа йәнә уларниң афғанистан, иран, һиндистан, түркийә қатарлиқ әлләргә көчүп барғанлиқи шуниңдәк бу мәзгилдики совет русийисиниң бу көчмәнләргә қаратқан сиясити, афғанистан, иран вә түркийә һөкүмәтлириниң мәйдани һәм башқа көплигән мәсилиләр йорутулған.
Китабниң бир алаһидилики шуки, буниңда 20 - 30 - йилларда қәшқәрийә вә или вадисида елип берилған бир қатар қозғилаңлар, көчмәнләрниң бу қозғилаңлар билән болған мунасивәтлири һәмдә москваниң шәрқий түркистан җумһурийити, ма җуңйиң башчилиқидики туңган күчлири һәм башқа күчләрни йоқитиш җәрянида шең шисәйни йөләп турғузғанлиқи қатарлиқ вәқәләр баян қилиниду.
Таҗик тарихчиси камал абдуллайев китабини йезиш үчүн москва, ташкәнт, дүшәнбә, лондон қатарлиқ җайлардики архиплардин пайдиланған.
Бу китаб асаслиқи икки дәврни оз ичигә алған болуп, биринчи дәвр 1917 - 1934 йиллиридики вәқәләр, иккинчи дәвәр 1941 - 1945 һәмдә 80 - йиллардики соғуқ мунасивәтләр уруши дәвридин ибарәт.
Камал абдуллайевниң 20 - 30 - йилларда москваниң уйғур елиға тутқан позитсийиси вә сиясити һәққидики баянлирида көплигән йеңи мәлуматлар мәвҗут болуп, 20 - әсир уйғур сиясити тарихини тәтқиқ қилишта әһмийәтликтур.
