Qaraqash nahiyisidiki balilar tetil mezgilide siyasiy idiye terbiyisi almaqta

Xoten wilayetlik hökümetning uchur torida déyilishiche, qaraqash nahiyilik hökümet qishliq tetil mezgilidiki bixeterlikke kapaletlik qilish, oqughuchilarning tetil mezgilidiki idiye ehwalini igilep turush we yüz bérish éhtimali bolghan weqelerning aldini élish üchün bir türküm kadirlarni mexsus oqughuchilarni qerellik halda mektepke yighip, idiyiwi terbiye bérishke orunlashturghan.

Melum bolushiche, bu kadirlar balilarni her jüme küni mektepke yighip, ulargha wetenperwerlik terbiyisi we qanunsiz diniy pa'aliyetlerge qatnashmasliq terbiyisi béridiken. Mektepke shu küni kelmigen balilarni öyigiche izdep bérip kélelmigenlikining sewebini sürüshtüridiken.

Xewerde, mushu usul arqiliq balilarni bashqurush we ularning herikitini kontrol qilish asan'gha toxtighanliqi we netijide balilar tetil mezgilide ish chiqirip qoyidighan ishlarning azayghanliqi yézilghan.

Uyghur élining nahiyilik hökümet tor betliri hemde jaylarning amanliq torlirida bérilgen munasiwetlik uchurlargha qarighanda, xitay da'irilirining yash ösmürlerge qaratqan siyasiy idiyiwi jehettiki kontrolni türlük wasitiler bilen kücheytkenliki, oqughuchi balilarning tetil mezgilidimu bu xil siyasiy alwanglar tüpeylidin aram élish pursitige érishelmeywatqanliqi melum.

Chet'ellerdiki közetküchiler, bu ehwalni qattiq tenqid qilip, bu, Uyghur oqughuchilargha qaritilghan siyasiy parakendichilik, dep atimaqta we buning ilmiy oqutush métodlirigha qattiq xilapliqini bildürmekte.