Уйғурбиз торбети 9-қетим қайта ечилди, йәнә бир уйғур торбети тақалди

Тор бәт бир айниң алдида, намәлум һаккер һуҗумлириниң үзлүксиз һуҗумида тақилип қалған. Торбәт бүгүн рәсмий ечилип мулазимитини қайтидин башлиди. Уйғурбиз торбети "5 ‏-июл" ниң алди-кәйнидә болуп аз дегәндә 8 қетим тақиветилгән. Бу қетимқиси 9‏-қетим қайта ечилишидур.

Торбәт техник хадимлириниң билдүрүшичә, нөвәттә бу торбәт чәтәлдә раван ечилиду; уйғур ели вә хитай өлкилиридә болса, хитайниң интернет тосиқидин һалқип өтүш йоли билән торбәтни көрүш мумкин. Торбәтниң бүгүнки хәвәрләр сәһиписидә баян қилинишичә, хитай өлкилиридики " шинҗаң синипи" оқуғучилири тәрипидин башқурулуватқан " дәвр" ториму икки күндин бери тақилип қалған. Мәзкур торбәт 2007 ‏-йили қурулған болуп, 5 ‏-июлдин кейин аман қалған аз сандики уйғур торбәтләрниң бири иди. Бу торбәт асаслиқи хитай өлкилиридики уйғур оқуғучилар арисида өгиниш вә турмуш җәһәттә учур-алақә мулазимитини қилип кәлгән; пәқәт айрим әһвалларда, оқуғучилар өзлириниң җәмийәт мәсилилири һәққидики қарашлири вә гуманлирини баян қилип кәлгән. Дәвр ториниң тақилиши хитайниң уйғурларниң һәр қандақ бир иҗтимаий мәсилә һәққидә пикир йүргүзүшини халимайватқанлиқини көрсәтмәктә.