Дуня уйғур қурултийи хәлқара җәмийәтни хитайниң 7 уйғурға өлүм җазаси бериш вәқәсини тәкшүрүшигә чақирди

Баянатта, хитай сотиниң мәзкур қарариниң дуня уйғур қурултийини райондики уйғурларниң вәзийити һәққидә техиму чоңқур әндишигә салғанлиқини билдүрди. Баянатта хитай даирилириниң террорлуққа қарши күрәшни баһанә қилип туруп, уйғурларниң һәққаний тәләплиригә қаттиқ зәрбә бериватқанлиқи, уйғурлар үстидин халиғанчә тутқун қилиш, қийнаш, өлүм җазасиға охшаш бастуруш васитилирини қоллиниватқанлиқи билдүрүлгән. Баянатта мундақ дейилгән:

7 Нәпәр уйғурға берилгән өлүм җазаси қаримаққа уйғурларниң көзини қорқутуш үчүн өз мәйличә берилгән вә шундақла сиясий мәқсити күчлүк болған, адаләтсиз өлүм җазасидәк көрүнмәктә. Бу әһвал бизни техиму чоңқур әндишигә салмақта. Биз хәлқара җәмийәтни хитай һөкүмитидин вәқәниң тәпсилатини сүрүштә қилишқа, сот җәряниниң хәлқара сот өлчәмлиригә вә инсан һәқлири өлчәмлиригә чүшидиған-чүшмәйдиғанлиқини тәкшүрүшкә чақиримиз.

Доклатта йәнә, уйғур райониниң хитайдики виҗдан мәһбуслириға өлүм җазаси берилидиған бирдин ‏-бир район икәнлики вә буниң хәлқарадики инсан һәқлири тәшкилатлири тәрипидин дәлиллигәнлики тәкитләнди.

Хитай даирилири түнүгүн, радиомиз тәрипидин әйни чағда арал вәқәси вә йеңиириқ вәқәси дәп хәвәр қилинған вәқәгә алақидар дәп қолға елинған 12 уйғурниң 7 сигә өлүм җазаси, қалғанлириға айрим-айрим һалда муддәтсиз вә муддәтлик қамақ җазалири бәргәнликини елан қилған иди.