Dunya Uyghur qurultiyi xelq'ara jem'iyetni xitayning 7 Uyghurgha ölüm jazasi bérish weqesini tekshürüshige chaqirdi

Bayanatta, xitay sotining mezkur qararining dunya Uyghur qurultiyini rayondiki Uyghurlarning weziyiti heqqide téximu chongqur endishige salghanliqini bildürdi. Bayanatta xitay da'irilirining térrorluqqa qarshi küreshni bahane qilip turup, Uyghurlarning heqqaniy teleplirige qattiq zerbe bériwatqanliqi, Uyghurlar üstidin xalighanche tutqun qilish, qiynash, ölüm jazasigha oxshash basturush wasitilirini qolliniwatqanliqi bildürülgen. Bayanatta mundaq déyilgen:

7 Neper Uyghurgha bérilgen ölüm jazasi qarimaqqa Uyghurlarning közini qorqutush üchün öz meyliche bérilgen we shundaqla siyasiy meqsiti küchlük bolghan, adaletsiz ölüm jazasidek körünmekte. Bu ehwal bizni téximu chongqur endishige salmaqta. Biz xelq'ara jem'iyetni xitay hökümitidin weqening tepsilatini sürüshte qilishqa, sot jeryanining xelq'ara sot ölchemlirige we insan heqliri ölchemlirige chüshidighan-chüshmeydighanliqini tekshürüshke chaqirimiz.

Doklatta yene, Uyghur rayonining xitaydiki wijdan mehbuslirigha ölüm jazasi bérilidighan birdin ‏-bir rayon ikenliki we buning xelq'aradiki insan heqliri teshkilatliri teripidin delilligenliki tekitlendi.

Xitay da'iriliri tünügün, radi'omiz teripidin eyni chaghda aral weqesi we yéngi'iriq weqesi dep xewer qilin'ghan weqege alaqidar dep qolgha élin'ghan 12 Uyghurning 7 sige ölüm jazasi, qalghanlirigha ayrim-ayrim halda muddetsiz we muddetlik qamaq jazaliri bergenlikini élan qilghan idi.