Uyghurlar fe'irfakis shehiride yéngi yilni qarshi aldi

Amérika Uyghurliri jem'iyiti we xelq'ara Uyghur kishilik hoquq we démokratiye fondi jem'iyitining teshkillishi bilen amérika paytexti washin'gton shehiri we uning etrapidiki wirjinya,maryland hem shuningdek bashqa shtatlardin kelgen köp sanda Uyghurlar fe'irfakis shehiride 2012 - yilini kütüwélish pa'aliyiti ötküzdi.
Muxbirimiz ümidwar
2012-01-01
Share

Texminen 150din artuq adem qatnashqan mezkur pa'aliyet hemme adem birdek halda öre turup, Uyghur milliy marshi oqush bilen bashlandi. Arqidin dunya Uyghur qurultiyining re'isi rabiye qadir xanim nutuq sözlep, Uyghurlarning yéngi yilini tebriklidi shuningdek barliq Uyghur jama'iti hemde ana wetendiki Uyghur xelqining yéngi yilining muweppeqiyetlik, aman - ésenchilik we ümid bilen tolghan yil bolushini tilidi.

Uyghur milliy herikitining rehbiri rabiye qadir xanim sözide ötken bir yildiki qolgha keltürülgen netijilerni xulasilep, 2011 - yilining Uyghurlar üchün yenila muweppeqiyetlik bolghanliqi, qilin'ghan köpligen xizmetler ichide gewdiliklirining birining jenwede échilghan b d t ning yighinida rabiye qadir bashliq dunya Uyghur qurultiyi wekillirining xitay terep wekillirining ularni qarilash herikitini meghlup qilip, b d t ezaliri we dunya jama'etchilikige Uyghurlar mesilisini anglitishni qolgha keltürgenliki ikenlikini bildürdi. Rabiye xanim bu yighinda amérika hökümiti wekilliri xitay wekillirige qarshi chiqip, dunya Uyghur qurultiyi wekillirini qollighanliqini tesirlik halda eslep ötti.

Rabiye qadir xanim sözide yene yéqinda guma nahiyiside xitay saqchilirining 7 Uyghurni étip öltürüp, balilarni tutqun qilghanliqi, shuningdek ötken 7 - ayda yüzbergen xoten we qeshqer weqelirini esletti. U yene 2011 - yili, amérikidiki Uyghurlar üchün Uyghur öyi sétiwélin'ghanliqi we özining kelgüsi pilanliri heqqidimu toxtaldi. Uning sözliri qizghin chawaklar bilen qarshi élindi.

Bu qétimqi yéngi yil pa'aliyitining özgichiliki shuki, bu qétim pa'aliyetke qatnashqan yashlarning nisbiti alahide yuqiri bolup, yashlar özlirining yuqiri qizghinliqini namayan qildi. 2011 - Yili, 12 - noyabir künidiki jumhuriyet küni pa'aliyitidimu yashlar özlirining yuqiri aktipliqini körsetken bolup, köpchilik, yash ewladlarning bu xil milliy qizghinliqidin apirin oqushti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet