ۋېيتنام خىتاينىڭ تالاش - تارتىش ئىچىدىكى تاقىم ئاراللاردا ساياھەت رايونى بەرپا قىلىش پىلانىغا نارازىلىق بىلدۈردى

خىتاينىڭ جەنۇبىي دېڭىزدىكى ئىگىلىك ھوقۇقى تالاش - تارتىش قىلىنىۋاتقان تاقىم ئاراللاردا ساياھەت رايونى بەرپا قىلىش پىلانى ۋېيتنامنىڭ نارازىلىقىنى قوزغىدى. خىتاي مەزكۇر پىلانىنى ئۆتكەن پەيشەنبە كۈنى ئېلان قىلغان ئىدى.
ﻣﯘﺧﺒﯩﺮﯨﻤﯩﺰ ﺷﻮﻫﺮﻩﺕ ﻫﻮﺷﯘﺭ
2010-01-05
Share

بۇنىڭغا قارىتا تۈنۈگۈن ۋېيتنام تاشقى ئىشلار مىنىستىرلىقى مەخسۇس بايانات ئېلان قىلىپ، خىتاينى مەزكۇر پىلاندىن دەرھال ۋاز كېچىشكە چاقىرغان. باياناتتا ئەگەر خىتاي مەزكۇر پىلاندىن ۋاز كەچمىسە تاقىم ئاراللار ۋەزىيىتىنىڭ تېخىمۇ جىددىيلىشىدىغانلىقى ئەسكەرتىلگەن.

جەنۇبى دېڭىزدىكى Paracels ۋە Spratlys تاقىم ئاراللىرىنىڭ ئىگىلىك ھوقۇقى، خىتاي، ۋېيتنام، فىلىپىن، برۇنىي قاتارلىق دۆلەتلەر ئارىسىدا ئۇزۇندىن بېرى تالاش - تارتىش قىلىنىپ كەلمەكتە. بولۇپمۇ بۇ ئاراللاردا زور مىقداردا تەبىئىي بايلىقلارنىڭ بايقىلىشى تەرەپلەرنىڭ مەزكۇر ئاراللارغا قارىتا ئىگىدارچىلىق ئىشتىھاسىنى كۈچەيتمەكتە.

ۋېيتنامنىڭ نارازىلىقىغا خىتاي بۈگۈن جاۋاب قايتۇرغان. خىتاي تاشقى ئىشلار باياناتچىسى ۋېيتنامنىڭ نارازىلىقىغا دىققەت قىلغانلىقىنى بىلدۈرۈش بىلەن ئارالنىڭ ئىگىلىك ھوقۇقىنى مۇنازىرە قىلىشقا بولمايدىغانلىقىنى، چۈنكى ئۇنىڭ خىتايغا تەۋە ئىكەنلىكىنى تەكىتلىگەن.

ۋېيتنام ئۆتكەن ئايدا رۇسىيىدىن يېڭى تىپتىكى قورال سېتىۋېلىش ئۈچۈن توختام ئىمزالىغان. كۆزەتكۈچىلەر ۋېيتنامنىڭ بۇ قېتىمقى قورال سېتىۋېلىش پىلانىنى تاقىم ئاراللار مەسىلىسىدە خىتاينىڭ تەھدىتىگە قارشى تەييارلىق دەپ قارىماقتا.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت