Ваң лечүән хитайниң түркийидики баш әлчиси гуң шавшиң билән пинһан учрашқан

Түркийә президенти абдулла гүлниң үрүмчи зияритидә униңға һәмраһ болуп үрүмчигә кәлгән хитайниң түркийидики баш әлчиси гуң шавшиң, түркийә президентини йолға селип қоюп узун өтмәй уйғур аптоном райони парткоминиң секритари ваң лечүән билән пинһан учрашқан.
Мухбиримиз әркин
2009-07-01
Share

Шинҗаң ахбарат тори"ниң хәвәр қилишичә, тәрәпләр сәйшәнбә күни учрашқан болуп, ваң лечүән "түркийә билән 'шинҗаң' ниң мәдәнийәт вә өрп - адәт җәһәтләрдә йеқинчилиқи барлиқи.... Шинҗаң билән түркийә арисидики ташқи сода вә мәбләғ селинмиси җәһәтләрдә илгириләп, көп тәрәплимилик, көп қатламлиқ алақә вә һәмкарлиқни қанат яйдуруш"ни үмид қилидиғанлиқини тәкитлигән.

Гуң шавшиң болса хитай әлчиханисиниң "шинҗаң" парткоми вә һөкүмити билән актип маслишип, алақә вә тәшвиқатни күчәйтип беридиғанлиқи, муқимлиқни вә тәрәққиятни қоғдайдиған түрлүк хизмәтләрни яхши ишләйдиғанлиқини билдүргән. Түркийә президенти абдулла гүл йеқинда бир һәптилик хитай зияритиниң ахирқи күни үрүмчини зиярәт қилип, аптоном районниң рәиси нур бәкри вә ваң лечүәнни қобул қилған иди.

Абдулла гүлниң үрүмчи зиярити хитай һөкүмити қәшқәр қәдимий шәһәр рәстилирини чеқиватқан мәзгилгә тоғра кәлгән иди . У, үрүмчидики бир қетимлиқ сөзидә уйғурларни түркийә - хитай мунасивәтлиридики муһим бир амил, дегән. Лекин гүлниң хитайларға уйғурларниң диний, мәдәнийәт вә кишилик һоқуқ мәсилилири түркийә көңүл бөлидиған мәсилиләрдин икәнликини оттуриға қойған яки қоймиғанлиқи мәлум әмәс.
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт