Мухбиримиз үмүдвар
2010-04-25
Хитай тилида тарқитилидиған "бошүн" торида елан қилинған хитай апторлири язған инкас мақалилириниң биридә ваң лечуәнниң шинҗаңдики 16 йиллиқ һөкүмранлиқ дәвридә пәқәт уйғурларниңла әмәс, һәтта хәнзуларниңму нәпритигә учриғанлиқи, униң " үч хил күчкә" зәрбә бериш шоари астида зораванлиқ васитиси қоллиниш нәтиҗисидә милләтләр ара өчмәнлик вә айримичилиқ күчийип кәткәнлики оттуриға қоюлиду.
Америка авазиниң хитай тили бөлүми 25 - април күни елан қилған мақалидә мәркизий комитетниң ваң лечуәнни хизмитидин қалдуруп, униң орниға хунән өлкилик партийә комитетиниң секретари җаң чүншәнни секритарлиқ вәзиписигә қоюшиниң, бейҗиңниң уйғурларни асас қилған шинҗаң райониға нисбәтән мөтидил вә юмшақ сиясәт йүргүзүш йолиға маңғанлиқини көрситидиғанлиқи оттуриға қоюлған.
Хитай инкасчилири, ваң лечуәнни қаттиқ қол сиясәт йүргүзгүчи, җаң чүншәнни мөтидил йол тутқучи, дәп пәрәз қилишқан. Әмма, дуня уйғур қурултийиниң баянатчиси дилшат ришит, б б с вә америка авази қатарлиқ мәтбуатларға бәргән баянатида хитай мәркизий һөкүмитиниң башлиқларни йөткисиму, уларниң әзәлдин бастуруш сияситини өзгәртмигәнлики, уйғур миллитиниң мәнпәәтлириниң һаман зәрбигә учрайдиғанлиқини илгири сүргән.
Минпав гезитидики анализда болса, ваң лечуәнниң вәзиписидин қалдурулуши билән нур бәкри қатарлиқ башқа бир қисим әмәлдарларниңму орнидин қалдурулуш мумкинлики пәрәз қилинған.
Өткән йили, 9 - айда үрүмчидә өткүзүлгән хитайларниң намайишида ваң лечуәнни тәхттин чүшүрүш шоари товланған, арқидинла үрүмчи шәһәрлик партком секретари ли җи вәзиписидин қалдурулған иди.
