Uyghur élide 2010 - yilliq 'wetenperwer diniy zatlarni terbiyilesh kürsi' bashlandi

Murasimda, aptonom re'isi nur bekri diniy zatlardin "shinjangning menggülük eminliki üchün eqil - paraset we küch chiqirish" ni telep qilghan.

Uyghur ziyaliylar buning yenila, Uyghur élidiki diniy ammining étiqad erkinlikini chekleshke qaritilghanliqini ilgiri sürmekte.

Nur bekri "diniy zatlarni toplap terbiyilesh" xizmitining "shinjangni muqim qilip؛ shinjangni güllendürüsh, xelqni bay qilip؛ chégrani mustehkemlesh" istratégiyisidiki muhim heriket ikenlikini körsetken.

Nur bekri yene, terbiyilesh arqiliq, diniy zatlarning "milliy bölgünchilik we qanunsiz diniy pa'aliyetlerge qarshi siyasiy meydanning yenimu mustehkemlinip, siyasiy jehette ishen'gili, we halqiliq peytlerde muhim rolni jari qildurghili bolidighan wetenperwer diniy zatlar qoshuni barliqqa kelgen" likini bildürgen.

Nur bekri diniy zatlardin "wetenni söyüp qanun'gha boysunush, ittipaqliq we muqimliqi idiyisi" ni terghib qilishini telep qilghan.

Yawropada yashawatqan bir diniy zatning bildürüshiche, xitay kompartiyisi uzundin buyan mushu xildiki "atalmish wetenperwer diniy zatlar" din paydilinip Uyghurlarning diniy étiqad erkinlikini cheklep, diniy ammini kontrol qilip kelgen.

U bu heqte toxtilip, "bu atalmish diniy zatlar bolsa, bir türküm ma'ashliq dindarlardur. Ular xitay hökümiti bergen azghina ma'ash bedilige, öz qérindashlirigha zulum sélishqa qatnashmaqta. Bu 'wetenperwerlik' emes, xa'inliqtur " dédi.

Derweqe, xitay hökümitimu bu xildiki diniy zatlargha "asasiy qatlamda alahide wezipini üstige alghan kadirlar," dep nam bergen idi.