Бейҗиң, 3-нөвәтлик “шинҗаңға нишанлиқ ярдәм бериш хизмәт йиғини” ачти

Хитай мәркизий һөкүмитиниң уйғур елигә қаратқан идарә қилиш истратегийисини бәлгиләйдиған “шинҗаңға нишанлиқ ярдәм бериш хизмити йиғини”ниң 3-қетимлиқи бейҗиңда өткүзүлди.
Мухбиримиз ирадә
2012.05.31

30-Май күни хәлқ сарийида чақирилған йиғинға хитай дөләт рәиси ху җинтав, муавин дөләт рәиси ши җинпиң вә баш министир вен җабав қатарлиқлар қатнашти.

Мәзкур йиғинға йәнә сиясий бюро әзаси бо шиләй вәқәси мунасивити билән вәзиписидин йирақлаштурулғанлиқи һәққидә учурлар тарқалған һәмдә ююқсизла 18-нөвәтлик мәмликәтлик хәлқ қурултийиға уйғур елидин вәкил қилип көрситилгән, сиясий қанун комитетиниң секретари җов йоңкаңму қатнашқан.

Шинхуа агентлиқиниң бу һәқтики хәвиридә, икки йилдин буян уйғур елиниң пән-техника, хәлқ турмуши, иқтисад, маарип вә сәһийә саһәсидә зор өзгиришләрниң барлиққа кәлгәнлики илгири сүрүлгән һәм “шинҗаңға ярдәм бериш хизмити йиғини” ниң роһини буниңдин кейин техиму чоңқур әмәлийләштүрүш оттуриға қоюлған.

Хитай мәркизий һөкүмити 5-июл вәқәси йүз берип, узун өтмәйла “шинҗаң хизмити йиғини” ни чақирип, иқтисадни тәрәққий қилдуруш шоарини көтүрүп чиқип, уйғур елини 19 өлкә вә шәһәрниң ярдәм беришигә тәқсимләп бәргән иди. Бейҗиң даирилири, мәркизий һөкүмәтниң бу орунлаштуруши вә районға болған көңүл бөлүшиниң әһмийитиниң зорлуқини давамлиқ юқири баһалимақта.

Бирақ, уйғур елидин игиләнгән учурлардин мәлум болушичә вә дуня уйғур қурултийи қатарлиқ уйғур тәшкилатлириниң инкас қилишичә, 19 өлкиниң уйғур елигә кириши йәрлик хәлққә нәп беришниң әксичә, уларниң яшаш имканийитини техиму тарлаштуруп, бу җайдики хитай көчмән нопусини техиму ашуруп, йәрлик хәлқниң наразилиқини ашурувәтмәктә. Уйғурларниң наразилиқ инкаслири вә пикирлиригә нисбәтән қаттиқ бесим көрситип, зәрбә бериш давамлиқ күчәйтилмәктә.

Чәтәлләрдики уйғур паалийәтчилири “шинҗаңға ярдәм бериш хизмити йиғини” ни хитай һөкүмитиниң уйғур елини техиму илгириләп талан-тараҗ қилиш, көчмән йөткәш вә бу арқилиқ өз һакимийитини мустәһкәмләш шуниңдәк уйғур тилини маариптин вә мәмурий саһәләрдин қоғлап чиқирип, хитай тилини уйғур тилиниң орниға дәсситип, қәдәмму-қәдәм ассимилятсийә қилиш һәрикити дәп қаримақта.

Хәлқаралиқ кишилик һоқуқ тәшкилатлириниң қаришичә, “шинҗаңға ярдәм бериш хизмити йиғини” ечилип, хитай мәркизий һөкүмитиниң йеңи орунлаштурулуши йолға қоюлғандин буян, уйғур елиниң қәшқәр, хотән, қағилиқ вә башқа җайлирида йәнә бир қатар наразилиқ һәрикәтлири йүз берип, райондики наразилиқ, тәңсизлик вә кишилик һоқуқни дәпсәндә қилишниң йәнила еғирлиқини испатлиди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.