Xitay 2008 ‏ - yildiki isyan sewebidin jazalan'ghan 3 neper tibetni étip tashlighan

Daramsaladiki tibet mehbuslar hoquqi teshkilatining peyshenbe küni ashkarilishiche, xitay da'iriliri 2008 ‏ - yildiki lxasa isyanigha qatnashqanliq sewebidin qolgha élip, ölüm jazasigha höküm qilghan tibetlerdin 3 kishini étip tashlighan.
Muxbirimiz erkin
2009-10-22
Share

Daramsaladiki mezkur tibet mehbuslar hoquqi teshkilati 14 - mart lxasa isyanigha chétilip ölüm jazasigha höküm qilin'ghan 2 tibetlik erkek bilen bir ayalning charshenbe küni xitay eskerliri teripidin étip tashlan'ghanliqini bildürdi.

Xitay hökümiti bu yil ürümchide yüz bergen  "5 - iyul weqesi"ni Uyghur rehbiri rabiye qadirgha artqan'gha oxshashla 2008 ‏ - yili 14 ‏- martta yüz bergen lxasa weqesini tibet rohani dahisi dalay lamagha artqan idi. Xitay da'iriliri shu qétimqi weqede 21 kishining ölgenliki we ölgenlerge isyanchilarning jawabkar ikenlikini jakarlighan.

Lékin daramsaladiki tibet sergerdan hökümiti xitay bixeterlik qisimliri teripidin öltürülgen tibetlerning sani 200 din ashidighanliqini bildürgen idi. Tibetlik sabiq mehbuslar teripidin qurulghan mehbuslar hoquqini qoghdash teshkilati "yéqindin béri xitay saqchilirining tibetlerni tutqun qilishi sewebidin lxasa weziyitining yene jiddiyliship ketkenliki"ni eskertip, lxasada élip bériliwatqan "bu heriket 2008 - yili xitay hökümitige qarshi isyan'gha qatnashqan tibetlerni basturush herikiti" ikenlikini ilgiri sürgen.

Xitay metbu'atliri bu yil 4 - aydiki xewerliride ikki tibetlikning ötken yilqi weqe sewebidin ölüm jazasigha höküm qilin'ghanliqini xewer qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet