Xitay 5 - iyul weqesige munasiwetlik 200 kishini sotlaydighanliq xewirini inkar qildi

Bir kün aldida yeni düshenbe küni xitay xelq gézitide, ürümchi sheherlik ottura sotta, mushu hepte ichide 200 neper 5 - iyul jinayet gumandarliri sotlinidighanliqini, shundaqla da'iriler 200 neper jinayet gumandarlirigha 170 neper Uyghur we yene 20 neper xitay aqlighuchi adwokat orunlashturghanliqini élan qilghan idi.

Seyshenbe küni Uyghur aptonom rayonluq partkom axbarat bölümi bashliqi xu xenméy, bu heqte " shinjang da'irilirining bu hepte ichide 200 jinayet gumandarini sotlash pilani yoq" dégen. Shundaqla 5 - iyul weqesi munasiwiti bilen resmiy qolgha élin'ghanlarning 83 neper ikenlikini tekitligen.

Yer shari waqit gézitining bu heqtiki xewiride Uyghur éli weziyitidin xewerdar bir yuqiri derijilik xitay emeldarning sözini neqil élip körsitishiche, " bir tereptin 18 - nöwetlik ürümchi soda yermenkisining harpisi, ikkinchi tereptin musulmanlarning ramizan mezgili bolghachqa, xitay da'iriliri bu sezgür mezgilde yene bir qalaymiqanchiliqning aldini élishni oylap, sot achmasliqi mumkin."

B b s ning xewiride körsitishiche, bezi mulahizichilerning qarishiche, hökümet axbaratlirining, Uyghur élining nazuk mesililiri heqqide ilgiri - axiri oxshimighan xewerlerni élan qilishi, xitayning sirtqa qarita teshwiqatni kücheytish we ichki jehette axbaratni kontrol qilishtek ziddiyetlik siyasitining mehsuli.