Хитай америкиниң 2011-йиллиқ һәрбий доклатиға наразилиқ билдүрди

Пәнтагон алдинқи күни 2011-йили һәрбий доклатини елан қилған. Доклатниң хитайға алақидар қисмида, хитайниң һәрбий тәрәққиятиниң ғәрбий тинч окян райониниң тинчлиқиға хәвп шәкилләндүрүватқанлиқи тилға елинған.
Мухбиримиз шөһрәт һошур
2011.08.26

Америка вә иттипақдашлири тинч окян районидики кәлгүси хитай тәһдитигә қарита һошяр болушқа қарита агаһландурулған иди. Доклатта, бу еһтималлиқни испатлаш үчүн, хитайниң йеқинда тәрәққий қилдурған авиаматка қатарлиқ һәрбий әслиһәлири, аләм бошлуқи сәпәрлири вә йиллиқ һәрбий хираҗәтлири пакит қилип көрситилгән.

Бүгүн хитайниң дөләт мудапиә министирлиқи бу һәқтә баянат елан қилип, пәнтагонниң мәзкур доклатидин қаттиқ нарази икәнликини билдүрди. Хитай тәрәп баянатида, пән-техникиниң тәрәққиятиға әгишип хитайниң һәрбий қораллириниңму илғарлишиватқанлиқини, айрилған һәрбий хираҗитиниңму пәқәтла мудапиә мәқсәтлик икәнликини тәкитлиди.

Баянатта йәнә пәнтагон доклатида, хитайниң һәрбий тәрәққиятини мубалиғиләштүрүлгәнлики тилға елинип, доклатта оттуриға қоюлған әндишә вә агаһландурушларни пүтүнләй асассиз дәп көрсәтти.

Ройтирсниң бүгүнки хәвиридә гәрчә пәнтагонниң доклати хитайниң қаттиқ наразилиқини қозғиған болсиму, икки тәрәпниң нөвәттики вәзийитидә хитай тәрәпниң аччиқини ичигә ютушқа мәҗбур икәнлики, шуңа бу наразилиқниң икки тәрәп мунасивитиниң давамлишишиға тәсир көрситәлмәйдиғанлиқи оттуриға қоюлған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.