Xitay mu'awin bash ministiri li kéchyang awstraliyide resmiy ziyarette bolmaqta

Gerche nurghun kishiler xitay tilini intayin yaxshi bilidighan kéwin rud awstraliyige bash ministir bolghandin kéyin ikki dölet munasiwitining qoyuqliship kétidighanliqini perez qilghan bolsimu, emeliyet buning eksiche bolup ikki dölet munasiwiti yirikliship ketken idi.

Bu yiriklik xitayning awstraliyining ri'o-ténto kan shirkitining xitayda turushluq mes'ullirini qolgha élishi bilen bashlinip, rabiye qadir xanimning mélborn filim féstiwaligha qatnishish üchün awstraliyige bérish mesilisi bilen téximu ewjige chiqti. Gerche xitay hökümiti rabiye qadir xanimgha wiza bermesliki üchün awstraliyige déplomatik yollar arqiliq béism ishletken bolsimu, emma uning paydisi bolmighan idi. Buninggha narazi bolghan xitay hökümiti li kéchyangning 8 - ayda awstraliyige élip baridighan ziyaritini emeldin qaldurghanliqini élan qilghan.

Kéyin awstraliye da'iriliri xitayning eng chong polat - tömür zawutining awstraliyidiki bir tömür roda kénigha meblegh sélishini dölet bixeterlik mesilisige chétilidighanliqi sewebi bilen tosqan idi.

Ikki dölet munasiwiti yamanliship ketken mushundaq bir peytte, xitay tashqi ishlar ministirliqi bayanat bérip, awstraliye bilen bolghan munasiwetlirining yamanliship kétishni xalimaydighanliqini, ikki terepning bir - birige hörmet qilghan asasta mesililirini hel qilip kételeydighanliqini ipade qilghan idi.

Li kéchyangning bu qétim awstraliyige élip baridighan ziyariti ikki dölet otturisidiki muzlarni éritish we ixtilaplarni hel qilishning charisini izdesh üchün élip bérilghan bir ziyaret dep qaralmaqta. Li kéchyang bu ziyaritide awstraliye bash ministiri kéwin rud bilen uchrishidu.

Melum bolushiche li kéchyang awstraliye ziyaritini ayaqlashturghandin kéyin yéngi zélandiye we papu'a nyugina qatarliq döletlerdimu ziyaret élip baridiken.