Awstraliye parlamént ezaliri belgilime chiqirip, xitay shirketlirining térilghu yer sétiwélishini tosushni telep qildi

Yéqinda xitayning bir shirkiti awstraliyining yéngi jenubiy wéllis shtatidin zor kölemlik yer asti kömür zapas miqdari mol térilghu yer sétiwalghan bolup, bu bir qisim awstraliye parlamént ezalirida ashliq bilen teminlesh bixeterlikige nisbeten endishe qozghighan.

Bu heqtiki xewerlerdin melum bolushiche, xitay shirketlirining térilghu yer sétiwélishini tosush chaqiriqigha parlaménttiki bir qisim libérallar, yéshillar, musteqiller we konsérwatiplar awaz qoshqan.

Xitayning dölet igilikidiki shénxu'a guruhi yéngi jenubiy wéllis shtatidin térilghu yer sétiwalghan. Xewerlerde shénxu'a guruhi sétiwalghan mezkur térilghu yer qatlimida 30 yilgha yétidighan kömür zapisi barliqi, xitay shirkitining térilghu yerni buzup, kömür qézish éhtimalliqi barliqi ilgiri sürülgen.

Awstraliye konsérwatip parlamént ezasi barnabiy joys awstraliye hökümitini agahlandurup, “Térilghu yerlerni sétishni qet'iy cheklesh kérek. Eger bu térilghu yer buzulsa, uni menggü eslige keltürgili bolmaydu. Awstraliye xitay shirketliri eng köp meblegh séliwatqan döletlerning biri. Lékin xitayning meblighi asasliqi awstraliye yer asti kan bayliqigha sélin'ghan” dédi.