Хитай ахбарати уйғур елидә айропилан гөрүгә елиш вәқәси йүз берип әмәлгә ашмиғанлиқини илгири сүрди

Хитай һөкүмәт ахбарат васитилириниң хәвәр қилишичә, 29-июн тйәнҗин һава йоллириниң хотәндин үрүмчигә қарап учқан бир йолучилар айропиланини гөрүгә елиш вәқәси йүз берип әмәлгә ашмиған.
Мухбиримиз әркин
2012.06.29
Share on WhatsApp
Share on WhatsApp

Хәвәрдә айропилан хотән айродромидин қозғилип он минуттин кейин, 6 нәпәр йолучиниң айропиланни гөрүгә елишқа урунғанлиқи, бирақ айропилан хадимлири вә йолучилар тәрипидин бойсундурулуп, айропиланниң сақ-саламәт хотән айродромиға қайтип чүшкәнлики илгири сүрүлгән. Уйғур аптоном районлуқ һөкүмәтниң ахбарат баянатчиси ху хәнмин, франсийә агентлиқиға мухбириға айропиланни гөрүгә алмақчи болғанларниң уйғур икәнликини билдүргән.

Даириләр мәзкур вәқәни “зораван террорлуқ қилмиш” дәп бекитип, муса йүсүп, абабәкри ибраһим, мәмәт ели йүсүп, ясин мәмәт қатарлиқ 6 исмини елан қилған болсиму, бирақ улар қолланған әсвабларни айропиланға қандақ елип чиққанлиқи һәққидә һечқандақ учур бәрмигән.

Дуня уйғур қурултийи шу күни дәрһал баянат елан қилип, хитай даирилириниң вәқәни бурмилиғанлиқини илгири сүрди. Д у қ баянатчиси дилшат ришитниң билдүрүшичә, вәқә айропиландики уйғур йолучилар билән хитай йолучиларниң өз ара орундуқ талишип йүз бәргән маҗирадин келип чиққан.

Бирақ хитай даирилири гөрүгә алғучиларниң учқучи кабинкисиға киришкә урунған болсиму, лекин ишикни ачалмиғанлиқи, айропиландики йолучилардин аз дегәндә 4 кишиниң яриланғанлиқини илгири сүрмәктә.

Мәзкур вәқә хитай даирилириниң “5-июл вәқәси” ниң 3 йиллиқи йетип келиштин бурун уйғур елидә аманлиқ тәдбирлирини күчәйтип, кәң көләмлик тазилаш елип бериватқан, тасадипий вәқәләрниң йүз беришидин сақлинишқа урунуватқан бир мәзгилдә йүз берип, көзәткүчиләрниң диққитини қозғиди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.