Xitay 'qa'ide' ge boysunmighan yerlik muxbirlarning qara tizimlikini turghuzidiken

Xitay döletlik axbarat we neshriyat idarisining organ mejmu'eside élan qilin'ghan bu heqtiki bir uchurda mezkur organning " metbu'at kespidiki nachar xa'ishlarni xatirileydighan uchur ambiri turghuzidighanliqi" ni bildürgen.

Organ mejmu'esining xewirige qarighanda, xitayning axbarat qa'idisi we qanunigha xilapliq qilghan muxbirlarning muxbirliq kinishkisi tartiwélinidighan bolup, xitay döletlik axbarat we neshriyat idarisining mu'awin bashliqi li dungdung "bu xildiki kishilerning ismi tizimlikke kirgüzülidu shundaqla bu kishiler xewer bérish we tehrirlik xizmitidin men'i qilinidu" dégen. Li dungdung qara tizimlik turghuzush "yalghan xewerlerning aldini élish " éhtiyajidin tughulghanliqini bildürgen bolsimu, lékin birleshme agéntliqi bu heqtiki xewiride qara tizimlik xitayning memliket ichidiki axbarat wastilirigha qaritilghan bir qatar cheklimilerning bir qisimi, ikenlikini tekitligen.

Analizchilar, bu belgilime xitay jem'iyitidiki nazuk siyasi, ijtima'iy mesililerni xewer qilghan muxbirlargha qaritilghanliqini ilgiri sürmekte. Lékin bu belgilime xitayda xizmet qilidighan chet'ellik muxbirlargha tedbiqlanmaydighan bolup, bu, xitay dölet teweligidiki axbarat xadimlirini nishan qilidiken.

Xitay qara tizimlik turghuzushni élan qilishtin bir qanche kün ilgiri merkizi amérikining nyuyork shehiridiki muxbirlarni qoghdash komitéti doklat élan qilip, xitay da'irilirining metbu'at erkinliki we oxshimighan pikirdiki axbarat xadimlirigha ziyankeshlik qiliwatqanliqini tenqidligen idi.