Xitay jama'et xewpsizlik ministirliqi muqimliq üchün 500 neper bayanatchi terbiyilidi

Xitay jama'et xewpsizlik ministirliqi tor bétidin ashkarilinshiche, mezkur ministirliqning pütün memliket boyiche jama'et xewpsizlik tarmaqliri axbarat bayanatchilirini terbiyilesh kursi 30 - iyul tamamlan'ghan bolup, mezkur kursta 500 neper jama'et xewpsizlik xadimi mexsus axbarat orunlirigha bayanat bérish, muxbirlarning so'allirigha jawab bérish jehette siyasiy isitratégiyilik uchur téxnikisi terbiyilirini alghan.
Muxbirimiz gülchéhre
2009.08.04

Xewerde xitay jama'et xewpsizlik ministiri méng jyenjuning kurssantlargha qilghan sözini neqil élishiche, nöwettiki uchur hem axbarat dewride, türlük xirsqa uchrawatqan muqimliqni ishqa ashurushta, xitay jama'et xewpsizlik tarmaqliri, jem'iyet we amma bilen bolghan alaqini kücheytip, yuqiri sewiye, ilghar siyasiy sapa hem isitratégiyilik jem'iyet bashqurush sapasigha ige,intizamchan, axbarat igilesh hem tarqitish xadimlirigha muhtaj bolmaqta iken.

Méng jyenju yéngi terbiyilen'gen bu bayanatchilardin öz orunlirigha qaytip barghandin kéyin, jaylarda yüz bergen partlash xaraktérlik weqelerde weziyetni kontrol qilish, partiye‏ - hökümetning siyasitige masliship, her qandaq mesilide siyasiy sergürlük bilen ish körüp, uchur axbarat sahesidiki muqimliqni qoghdashni özining birinchi wezipisi dep xizmet qilishni telep qilghan.

Xitay da'iriliri nöwette kommunistik partiyining jumhuriyet qurghan 60 yilliqini tebriklesh jeryanida her qandaq qalaymiqanchiliqning aldini élish üchün her tereplime qattiq teyyarliq körmekte shundaqla Uyghur hem tibet rayonliridiki kontrolluqini barghanche kücheytmekte.

Xitay jama'et xewpsizliki ministiri méng jyenju buning aldida Uyghur élidiki xitay qoralliq saqchi hem herbiy qisimlirini mexsus ziyaret qilip, 5 - iyul weqesi jinayetchilirini iz qoghlap tutush salmiqini ashurushni telep qilghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.