Xitay bayanatchisi ichki mongghuldiki qarshiliq herikitige inkas qayturdi

Jiyang yü öz bayanatida, xitay “Hökümitining iqtisadiy tereqqiyat jeryanida, yerlikni asas qilghan herqaysi ijtima'iy guruhlarning menpe'itini qoghdaydighanliqini, emma awarichilik peyda qilghanlarni bosh qoyuwetmeydighanliqi” ni bildürgen.

Chet'ellerdiki mongghul teshkilatliridin ichki mongghul xelq partiyisining yaponiyidiki bash katipi kéri'éd kuwasgald ependining bildürüshiche, shilin'ghol aymiqida 23-may küni bashlan'ghan naraziliq namayishi hazir ichki mongghulning merkizi kökxot shehiri qatarliq jaylargha kéngeygen bolup, xitay da'iriliri ichki mongghulda jiddiy herbiy halet yürgüzgen, shundaqla tutqun qilish herikitini bashliwetken.

29-30-31-May künliri amérika, tashqi mongghuliye, yaponiye, shwétsiye, gérmaniye, gollandiye qatarliq döletlerdiki mongghullarmu özliri turuwatqan döletlerdiki xitay elchixaniliri aldida naraziliq namayishliri ötküzüp, ichki mongghuldiki mongghul qérindashlirining öz heq-hoquqini qoghdash yolida élip barghan namayishigha awaz qoshidighanliqini bildürgen. Melum bolushiche, yaponiye hem gollandiyidiki mongghullar namayishigha shu döletlerdiki Uyghurlarmu qatnashqan.

Mongghullarning 20 yildin buyanqi eng zor kölemlik naraziliq herikiti dep qaralghan bu qétimqi naraziliq namayishi, 11-may küni shilin'ghol yayliqidiki xitay kömürkan shirkitining yük aptomobil shopurining, shirket aptomobillirining yaylaqta kömür toshup, mongghul charwichilarning menpe'itige ziyan yetküzgenlikige naraziliq bildürgen, ujumchin qebilisidiki mongghul charwichilarning yétekchisi mergenni qesten aptomobilgha basturup öltürüwétish weqesini, shilin'ghol da'irilirining adil bir terep qilmighanliqigha naraziliq bildürüsh yüzisidin qozghalghan idi.