Xitay hökümiti xususiy shirket qurghan eng chong bayning jinayitini tekshürmekte

Xitaydiki eng chong bay dep atiliwatqan xu'ang gu'angyü 10 kün yoqap ketkendin kéyin, bügün xitayning saqchi da'iriliri  'jinayiti tekshürülüwatidu', 'jinayitining xaraktéri téxi békitilmidi' dep jakarlighan.  Hazir xitaydiki gézitlerde, xu'ang gu'angyü heqqide 'bazarni kontrol qiliwalghan', 'emeldarlargha para bergen', 'bankilardin alghan qerz mu'amilisi gumanliq' dégendek gepler chiqishqa bashlighan.

Amérika awazning bayan qilishiche, béyjing uniwérsitétining iqtisadshunas proféssori sha yélyang bu heqte mulahize yürgüzüp 'xu'ang gu'angyüdin qandaq éghir mesile tépilishi yaki uning qandaq jinayet bilen jazagha mehkum qilinishidin qet'iynezer, bu weqe hökümetning xususiy shirketlerge qandaq mu'amile qilidighanliqini intayin éniq chüshendürmekte.  Kommunist partiye baylarni bulash arqiliq hakimiyet tikligen partiye. Kommunist partiye hazirmu bayliq yaritishni emes, belki bayliqlarni bulap uni qandaq teqsim qilishnila oylaydu. Bundaq hakimiyettin yaxshiliq kütkili bolmaydu. Döletning iqtisadida mesile chiqqan hazirqidek weziyette, hökümet baylardin 'jinayet' izdesh arqiliq mesile hel qilmaqchi bolsa,  hemme bayni oxshash tekshürsun, xu'ang gu'angyüdin tépilghan mesile, dölet igilikidiki shirket xojayinlirining hemmiside bar, qanun aldida hemme adem barawer bolushi kérek' dégen.