Хитай компартийиси 'милли бөлгүнчилик'ни бастуридиғанлиқи тоғрисида җар салди

Шинхуа агентлиқиниң компартийә әмәлдарлириниң сөзини нәқил кәлтүрүп хәвәр қилишичә, хитай даириләр бу һәқтики агаһландурушни хитай компартийә мәркизи комитетиниң җүмә күни ахирлишидиған ахирқи күнлүк йиғининиң баянатида оттуриға қойған болуп, "миллий бөлгүнчилик паалийәтләргә қәтий зәрбә бериш, униңға қарши үнүмлик тәдбир елиш, сотсиялистик милләтләр мунасивитидики тәң баравәрлик, иттипақлиқ, өз ‏ - ара инақлиқни тәрәққи қилдуруш вә алға сүрүш"ни тәкитлигән.

Анализчилар, хитай компартийиси мәркизи комитетиниң бу нөвәтлик йиғинида 5‏ - июлдики үрүмчи вәқәси мәркәзлик музакирә қилинидиған мәсилиләрниң бири болуп қалидиғанлиқини илгири сүргән.

Хитай һөкүмити бу вәқәдә аз кәм 200 адәмниң өлгәнликини, өлгәнләрниң көп қисими хитайлар икәнликини елан қилған. Лекин чәтәлдики уйғур тәшкилатлири 10 миң уйғурниң из - дерәксиз йоқалғанлиқини, йәнә бәзи ғәйри рәсмий мәлуматларда из ‏ - дерәксиз йоқалғанларниң 23 миңға йетидиғанлиқини билдүргән иди.

Бу қетимқи йиғин ечилиштин сәл бурун, үрүмчидә йиңнә вәқәси йүз берип, үрүмчи вәзийитини йәнә җиддийләштүривәткән. Үрүмчидики хитай аһалиси намайиш қилип, ваң лечүәнниң истипа беришини, қолға елинғанларни қаттиқ җазалап беришни тәләп қилған иди.