Далай ламаниң вәкили келәр нөвәтлик сөһбәт нәтиҗә бәрмисә сөһбәтни тохтитиш еһтимали барлиқини билдүрди

Тибәт роһани даһиси далай ламаниң алаһидә вәкили лоди гяри пәйшәнбә күни сүргүндики тибәтләрниң 11 ‏ - айда чақирилидиған дарамсаладики пәвқуладдә қурултийида хитай билән елип бериливатқан сөһбәтни тохтитиш қарари чиқирилиш еһтимали барлиқини чәткә қақмиди.
Мухбиримиз әркин
2008-09-26
Share

Лоди гяри, келәр нөвәтлик хитай - тибәт сөһбити нәтиҗисиз ахирлашса, сөһбәтниң истиқбали 11 ‏ - айдики пәвқуладдә қурултайда музакирә қилинидиғанлиқи, қурултайниң сөһбәтни тохтитиш қарари чиқириш еһтималини чәткә қақмайдиғанлиқини билдүрди.

Хитай мәркизи бирликсәп бөлүми 10 ‏ - айниң ахирлири бейҗиңда далай ламаниң вәкиллири билән йәнә бир нөвәтлик сөһбәт өткүзиду. Лоди гяриниң әскәртишичә, хитай тәрәп келәр нөвәтлик сөһбәт далай ламаниң шәхси орниға мунасивәтлик мәсилиләр билән чәклинидиғанлиқини билдүргән. Лекин далай лама вәкилләр өмики тибәтниң аптономийилик орнини музакирә қилишта чиң туруватқан болуп, хитай тәрәп тибәтләрниң йиғинда өз пиланини тапшурса болидиғанлиқи, лекин бу сөһбәт мәзмуниға кирмәйдиғанлиқини тәкитлигән.

Лоди гяри, әгәр хитай келәр нөвәтлик сөһбәт нәтиҗигә еришәлмисә 11 ‏ - айдики қурултайниң сөһбәтни давамлаштуруш яки тохтитиш мәсилисини музакирә қилидиғанлиқи, әгәр қурултай сөһбәтни тохтитиш қарари чиқарса буниңға әмәл қилидиғанлиқини билдүргән.

Хитай һөкүмити бир тәрәптин, далай ламаниң вәкиллири билән сөһбәт елип барса, йәнә бир тәрәптин, далай ламани "бөлгүнчилик" билән әйиблимәктә. Хитай дөләт кабинти пәйшәнбә күни елан қилған " тибәт мәдәнийитини қоғдаш вә тәрәққи қилдуруш" тоғрисидики ақ ташлиқ китабта далай ламани тибәттә қуллуқ түзүмни тирилдүрмәкчи, дәп әйиблигән.
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт