Хәлқара кәчүрүм тәшкилати ахбарат елан қилип, лю шавбониң нәзәрбәнт қилинғанлиқини әйиблиди

Хәлқара кәчүрүм тәшкилати йеңи йил мунасивити билән ахбарат елан қилип, хитай даирилириниң өктичи қараштики хитай язғучиси лю шавбони рәсмий әйиблимәй яки қолға алмай һазирға қәдәр сәвәбсиз тутуп туруватқанлиқини тәнқид қилди.
Мухбиримиз әркин
2009.01.02
Share on WhatsApp
Share on WhatsApp

Ахбаратта, бир тинч өктичи затни "башқуруш усули " билән нәзәрбәнт астида тутуп туруш, җавабкарда болушқа тегишлик кишилик әркинлик, бихәтәрлик вә адиланә сотлиниш һоқуқиға даир омуми кишилик һоқуқ өлчәмлиригә хилап, дәп тәкитләнгән һәмдә хитай даирилиридин лю шавбони дәрһал вә шәртсиз қоюп беришкә чақирипла қалмай 2008низамнамисиға имза қойған өктичи затларға иғвагәрчилик қилишни тохтитиш тәләп қилинған.
 
Хитай чоң қуруқлуқидики зиялийлар йеқинда 2008 низамнамиси дәп аталған асасий қанун чақириқнамиси елан қилип, хитай даирилирини сияси ислаһат елип бериш, хитайда федератсийилик түзүмни йолға қоюшни тәләп қилған иди.

Лю шавбо 2008 низамнамисини түзүш вә имза қоюш паалийитини қозғиған шәхсләрниң бири болуп, узун өтмәй из ‏- дерәксиз йоқап кәткән иди. Лю шавбониң аялиниң ашкарилишиға қариғанда, даириләр уни бейҗиң әтрапидики мәлум бир җайда нәзәрбәнт астида тутуп турмақта икән. Хәлқара кәчүрүм тәшкилати даириләрниң лю шавбони қайси җинайәт билән тутуп туруватқанлиқини елан қилиш керәкликини, униң адвокат тәклип қилишиға рухсәт қилишни тәләп қилди.

Хәлқара кәчүрүм тәшкилатиниң бейҗиңдики вәзийәттин хәвәрдар әрбаплардин игилишичә, хитай һөкүмитиниң юқири қатлимидики әмәлдарлар 2008 низамнамә һәрикитиниң характерини " әксилинқилабий мунбәр" дәп бекитишни ойлашмақта икән. Бәзи көзәткүчиләр, әгәр бу хәвәр раст болса хитай һөкүмитиниң 2008 ‏ низамнамисигә имза қойғучиларға "шәпқәтсиз" вастиларни қоллинидиғанлиқини илгири сүрмәктә.



Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.