Xitay dölet bayrimi jeryanida Uyghur éligha téximu köp sayahetchi élip kélishke teyyarliq qilmaqta

Shinxu'a agéntliqining xewer qilishiche, 17 - séntebir küni Uyghur aptonom rayonluq hökümet sayahet mezgilidiki bixeterlikni kücheytish mesilisi boyiche téléwiziye - téléfon yighini échip, sayahet heptisi mezgilide ichkiri xitaydin téximu köp sayahetchilerning Uyghur éligha kélishi we ularning bixeterlikini qoghdash hem kapaletke ige qilish boyiche orunlashturush élip barghan.

Aptonom rayonining xitay millitidin bolghan mu'awin re'isi xu wey bu ishqa mes'ul bolghan bolup, u dölet bayrimi we tawuz chaghini mezgilidiki bixeterlik mesilini tekitlep, chong hadisilerning kélip chiqishini qet'iy kontrol qilishni telep qilghan.

Melumki, 16 - séntebir küni altay teweside bir sayahetchiler aptobusi qazagha uchrap, 11 adem hayatidin ayrilish weqesi kélip chiqqan idi.
 
Orunlashturush boyiche sayahet ishlirigha mes'ul tarmaqlar töt guruppa uyushturup, jenubi Uyghur élidiki sayahet esliheliri we bixeterlik ishlirini tekshürüshke ewetken. Mezkur tekshürüsh guruppisi her qaysi jaylarda 24 sa'etlik nöwetchilik orni qurghan.

Lékin, Uyghur weziyiti közetküchiliri, buning xitay hökümitining dölet bayrimi mezgilide peqet sayahetchilik ishlirining bixeterlikini qoghdashnila meqset qilmastin, belki bu mezgilde Uyghurlarning naraziliq heriketlirining yüz bérip qélishidin endishe qiliwatqanliqi, shu sewebtin pütün küch bilen Uyghurlarning naraziliq heriketlirining aldini élishnimu meqset qiliwatqanliqini tehlil qilmaqta.