2011-Yili xitay emeldar, bayliri we ziyaliyliridin 150 ming kishi chet'ellerge köchmen bolup olturaqlashqan

Matériyallardin melum bolushiche, 2010-yilghiche chet'ellerde köchmen bolup olturaqlashqan xitay puqralirining sani 45 milyon'gha yetken. Xitayning junggo bankisining 2012-yili 3-ayda tarqatqan “2011-Yilliq xitaydiki shexsi mülükni bashqurush aq tashliq kitabi” diki sanliq melumatlarda xitay baylirining 14% ning bashqa döletlerge köchmen bolup olturaqlashqanliqi yaki köchmen bolush resmiyetlirini béjiriwatqanliqi bayan qilinip, yene 46% bayning chet'ellerde olturaqlishishni oylishiwatqanliqi bayan qilin'ghan.

Gerche yéqinqi yillardin buyanqi munazirilerde, chet'ellerde olturaqlishiwatqan xitay bayliri arisida parixor xitay emeldarliri we ularning uruq-tughqanlirining barghanche köpiyiwatqanliqi ilgiri sürülgen bolsimu, emma xitay baylirining we yuqiri melumatliq xitay ziyaliylirining türküm-türkümlep chet'ellerde olturaqlishish yolini talliwélishi, ularning xitaydiki ijtima'iy we tebi'iy shara'itqa bolghan ishenchining yoqilishidin boluwatqanliqi tekitlenmekte.

Musteqil qelemkeshler jem'iyitining ezasi, gérmaniyide olturaqlashqan lyu xanim amérika awazi radi'osining ziyaritini qobul qilip, “Xitay bayliri we yuqiri melumatliq ziyaliylirining gherb döletliride olturaqlishishni tallishidiki muhim seweblerning biri, baylar xitayda özining shexsi mülkini saqlap qélishqa ishench qilalmighan bolsa, xitay ziyaliyliri xitayda barghanche boghuluwatqan démokratiye erkinlikini izdep gherb döletliride olturaqlashmaqta” dégen.