Béyjinggha bomba élip mangghan xitay erzdar yol üstide tutuwélin'ghan

Béyjingda chiqidighan yéngi sheher gézitining xewer qilishiche, xu famililik bir erzdar shenbe küni özi yasighan ikki dane bombini mashinisigha sélip lyawning ölkisidin béyjinggha qarap kétiwatqanda yol üstide tutqun qilin'ghan.
Muxbirimiz shöhret hoshur
2010.12.28

Xewerde bildürülüshiche mezkur erzdar shu küni etigende béyjing shehirige yéqinlashqanda, yol üstide mashinisigha bénzin qachilighan. Bénzin ponkitining xadimi bénzin pulini sorighanda, u özining bir erzdar ikenlikini we yénida puli yoqluqini éytqan, bénzin ponkiti xadimi uning aldini tosqanda, u mashinisida bomba barliqini bildürüp tehdit salghan we bénzinning pulini tölimestin yolini dawam qilghan.

Bu chaghda ponkit xadimi ehwalni saqchi melum qilghan. Erzdar xu béyjing sheher etrapidiki jingxa yuqiri sür'etlik yoligha kelgende, yene ikki yol tosush éghizidin yol pulini tölimestin tosuqni bösüp ötüp ketken. Buning bilen yol tosuq xadimlirimu ehwalni saqchigha melum qilghan. Saqchilar jiddiy heriketke kélip, xitay erzdar kétiwatqan yol üstige qat-qat tosuqlarni qurup, tekshürüsh élip barghan we erzdar sheherge bir sa'etlik musapide yéqinlashqanda saqchilar teripidin tutulghan.

Saqchilar uning mashinisini tekshürgende, rastinila mashinidin u özi yasighan ikki dane bomba we bomba yasash eswabi chiqqan. Weqe heqqide melumat bergen saqchilar, bu yil 35 yashqa kirgen bu erzdarning esli erzining néme toghriliq ikenliki we bombini hujum yaki tehdit üchün yasighanliqi heqqide melumat bermigen. Közetküchilerning qarishiche, erzdarlar mesilisi nöwette xitaydiki jiddiy mesililerdin biri bolup, nöwette béyjing sheher etrapidiki barliq chong köwrüklerning astining erzdarlar teripidin makan tutulghanliqi we ularning erz qiliwatqinigha aldigha 20 yildin ashqanliqi melum.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.