دۇنيا ئۇيغۇر قۇرۇلتېيىنىڭ بايانتچىسى دىلشات رىشىتنىڭ بايان قىلىشىچە، قەشقەرنى ئالاھىدە ئىقتىسادىي رايونغا ئايلاندۇرۇش پىلانىنى ئوتتۇرىغا قويغان خىتاي ھۆكۈمىتى بىر نەچچە كۈندىن بۇيان قەشقەردە، قوراللىق قىسىملار بىلەن چارلاش ئېلىپ بېرىشقا، قەشقەرنىڭ شەھەر ئىچىدىمۇ، ئەتراپتىكى ناھىيىلەردىن قەشقەرگە قاتنايدىغان يوللاردىمۇ قاتمۇ - قات توساق قويۇپ، ئۇيغۇرلارنى تېخىمۇ قاتتىق نازارەت ئاستىغا ئېلىشقا باشلىدى.
بوشۇن تور گېزىتى ئۆتكەن ھەپتىدە، خۇجىنتاۋ - ۋېن جاباۋ ھۆكۈمىتى ئۇيغۇر ئاپتونوم رايونىنى خىتايلاشتۇرۇشنى تېزلىتىش ئۈچۈن، خىتاينىڭ 19 ئۆلكە ۋە چوڭ شەھەرلىرىگە ياردەم بېرىش دېگەن نام بىلەن ئۇيغۇر يۇرتلىرىنى تەقسىملەپ بېرىپ، ئۇيغۇر يۇرتلىرىنى ئۇلارغا پارچىلاپ ئىدارە قىلغۇزۇشقا باشلىغانلىقىنىڭ تەپسىلىلاتىنى بايان قىلغان ئىدى.