Xitayda intérnét ishletküchilerning sani örligen

Intérnét qollan'ghuchilirining sani ilgiriki yildin 11 pirsent örligen. Buningdin sirt, qol téléfon we shuninggha oxshash bashqa eswablar arqiliq torgha chiqidighan abont sanimu 22 pirsent örlep, 388 milyon'gha yetken. Yeni, xitay boyiche nopusning 40 pirsenti intérnét ishlitishke bashlighan.

Birleshme agéntliqining éytishiche, xitay hökümiti iqtisad we ma'aripni ilgiri sürüsh üchün intérnét ishlitishni keng teshebbus qilsimu, emma siyasiy jehette sezgür mesililerge alaqidar mezmunlarni qattiq cheklep kelmekte. Dunyada misir we tunistiki xelq heriketliride zor rol oynighanliqi birdek étirap qiliniwatqan féysbuk we twittirgha oxshash ijtima'iy alaqe tor betlirimu xitayda qattiq cheklen'gen.

Téxi yéqindila xitay da'iriliri intérnét ishlitishke alaqidar maddilarni qaytidin retlep chiqip, tüzümlerni chingitqan idi. Emma közetküchiler xitay hökümiti intérnétni qanchilik kontrol qilishidin qet'iynezer intérnét arqiliq uchurning erkin tarqilishini tamamen kontrol qilip kételmeydighanliqini, intérnétning xitay puqralirigha munazire qilish pursiti yaritip bergenlikini we bu munazirining xitay jem'iyitining tereqqiyatida zor rol oynaydighanliqini bildürmekte.

Xitay da'iriliri 2009-yilidiki ürümchi weqesidin kéyin 10 ay barliq uchur-alaqe wasitilirini taqap, dangliq Uyghurche tor betlerning sahiblirini türmige qamighan idi.