Xitay merkiziy hökümiti béyjingdiki ish béjirish organlirini qisqartmaqchi

B b s ning xitay metbu'atliridin neqil keltürüshiche, nöwette, béyjingda turushluq mu'awin ölke derijilik ish béjirish orunlirining sani 52, sheher derijilik ish bashqurush orunliri 500, uningdin bashqa hökümetke tewe we her qaysi organlarning ish bashqurush orunliri 10 mingdin artuq iken.

Xitay merkiziy hökümiti mu'awin ölke derijilik ish bashqurush orunlirini saqlap qalghandin sirt qalghan, oblast, wilayet, sheher hem bashqilarning ish bashqurush orunlirini tekshürüp, békitkendin kéyin éhtiyajgha qarap élip qélinish bilen qalghan barliq ish bashqurush orunliri birdek qisqartilidiken.

Xewerde éytilishiche, bundaq bolushidiki seweb ish bashqurush orunliri nami bilen döletning iqtisadini qalaymiqan chiqim qilish, parixorluq köpeygen bolup, barliq ish bashqurush orunlirining otturiche bir yilliq omumiy chiqimi 10 milyard yüendin éship kétidiken. 52 Mu'awin ölke derijilik ish bashqurush ornining xizmetchisi 8000 din artuq bolup, qalghanlirini hésablighanda, bu zor san hésablinidiken.

Xewerlerdin qarighanda, béyjingda Uyghur aptonom rayonining ish bashqurush orginidin bashqa yene bir qisim wilayet hem bingtu'enning ish bashqurush orunlirimu tesis qilin'ghan bolup, xewerde éytilishiche, bingtu'enning ish bashqurush orunliri saqlinip qélinidighan orunlar qatarigha kirgüzülgen iken.