Байинғолинда моңғуллар билән хитай канчилар арисида тоқунуш йүз бәрди

Уйғур елиниң байинғолин областидики бир гуруппа чарвичилар билән у йәрдә кан ечиватқан хитай көчмәнлири арисида өткән һәптә тоқунуш келип чиққан.
Мухбиримиз шөһрәт һошур
2012.08.17
Share on WhatsApp
Share on WhatsApp

Вәқәгә хитай көчмәнлириниң байинғолинда кан ечиш җәрянида отлақларниң бузулуши, су мәнбәлириниң булғиниши қатарлиқ йәрлик хәлқләрниң мәнпәитиниң еғир дәриҗидә зиянкәшликкә учриши сәвәб болған. Һаят йоли вә турмуш адәтлири тәһдиткә учриған аһалиләр хитай канчиларға зиянни мәлум қилғанда уларниң қопал вә пәрвасиз муамилилиригә дуч кәлгән.

Америкида паалийәт елип бериватқан җәнубий моңғулийиликләр җәмийитиниң тор бетидә баян қилинишичә, хитай канчилар үрүмчидин қара гуруһларни яллап әкелип, шу җайдики моңғул чарвичиларға тәһдит салған. Нәтиҗидә икки тәрәп арисида тоқунуш йүз берип икки нәпәр моңғул чарвичи еғир дәриҗидә яриланған.

Мәлум болушичә, байинғолиндики хитай даирилири нөвәттә мәзкур вәқәниң җәмийәткә кәң билинип кетишиниң алдини алмақта. Әмма җәнубий моңғулийиликләр җәмийитиниң билдүрүшичә, нөвәттә моңғул чарвичиларниң қолида мәзкур тоқунушниң җәряни, шундақла, бузулған отлақ вә булғанған сулар һәққидә сүрәт вә син хатирилири бар болуп, улар мәсилини қануний йол билән бир тәрәп қилиш үчүн, өз мәнпәәтлиригә вәкиллик қилалайдиған бир адвокат издимәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.