Канада баш министири харпер хитайни зиярәт қилмақчи

Канада баш министири харпер 10 - айниң 28 ‏- күни елан қилған өзиниң хитай зиярити һәққидики баянатида, канаданиң "хитай билән көп тәрәплимилик өз ‏ - ара һөрмәт вә әмәли һәмкарлиқ иһтияҗини әкс әттүридиған күчлүк мунасивәт қурушқа тәйярлиқи"ни билдүргән иди.

Канада ташқи ишлар министири лавренес кәннон алдинқи күни канададики хитай мәтбуатлириниң зияритини қобул қилип, стипан харперниң хитай зияритиниң күнтәртипидики мәсилиләр тоғрисида мәлумат бәргән. Кәннон, иқтисади мәсилә харпер билән хитай рәһбәрлириниң арисидики сөһбәтниң мәркизи темиси һесаблансиму, лекин икки тәрәпниң өз‏ - ара көңүл бөлидиған мәсилиләрни оттуриға қойидиғанлиқини, сөһбәт күнтәртипидики мәсилиләр ичидә кишилик һоқуқниң барлиқини билдүргән. Лекин икки тәрәп көңүл бөлидиған мәсилиләрниң конкрет тәпсилатини ашкарилимиған.

Канада - хитай мунасивитидә консерватиплар партийиси һакимийәт сориған йеқинқи бир қанчә йилдин бери нурғун ихтилаплар келип чиққан иди. Бу ихтилаплар хитайниң уйғур канада пуқраси һүсәйин җелилни муддәтсиз қамақ җазасиға һөкүм қилип, униң канада пуқралиқини рәт қилиши, канада дипломатлириниң униң билән көрүшүшини рәт қилиши қатарлиқ мәсилиләрдә әкс әткән.

Униңдин сирт, хитай уйғур канада пуқралириниң уйғур илидә қалған аилә тавабатини гөрүгә еливелип, уларниң җәм болушини тосаш билән әйибләнгән иди. Лекин канада көңүл бөлидиған ишларниң ичидә бу мәсилиләрниң бар - йоқлуқи мәлум әмәс.