Kanada bash ministiri xarpér xitayni ziyaret qilmaqchi

Xitay tashqi ishlar ministirliqi peyshenbe küni bayanat élan qilip, kanada bash ministiri stipan xarpérning 2 ‏ - dékabirdin 6 ‏- dékabirgha qeder xitayni ziyaret qilidighanliqini jakarlidi.
Muxbirimiz erkin
2009.11.26
Share on WhatsApp
Share on WhatsApp

Kanada bash ministiri xarpér 10 - ayning 28 ‏- küni élan qilghan özining xitay ziyariti heqqidiki bayanatida, kanadaning "xitay bilen köp tereplimilik öz ‏ - ara hörmet we emeli hemkarliq ihtiyajini eks ettüridighan küchlük munasiwet qurushqa teyyarliqi"ni bildürgen idi.

Kanada tashqi ishlar ministiri lawrénés kennon aldinqi küni kanadadiki xitay metbu'atlirining ziyaritini qobul qilip, stipan xarpérning xitay ziyaritining küntertipidiki mesililer toghrisida melumat bergen. Kennon, iqtisadi mesile xarpér bilen xitay rehberlirining arisidiki söhbetning merkizi témisi hésablansimu, lékin ikki terepning öz‏ - ara köngül bölidighan mesililerni otturigha qoyidighanliqini, söhbet küntertipidiki mesililer ichide kishilik hoquqning barliqini bildürgen. Lékin ikki terep köngül bölidighan mesililerning konkrét tepsilatini ashkarilimighan.

Kanada - xitay munasiwitide konsérwatiplar partiyisi hakimiyet sorighan yéqinqi bir qanche yildin béri nurghun ixtilaplar kélip chiqqan idi. Bu ixtilaplar xitayning Uyghur kanada puqrasi hüseyin jélilni muddetsiz qamaq jazasigha höküm qilip, uning kanada puqraliqini ret qilishi, kanada diplomatlirining uning bilen körüshüshini ret qilishi qatarliq mesililerde eks etken.

Uningdin sirt, xitay Uyghur kanada puqralirining Uyghur ilide qalghan a'ile tawabatini görüge éliwélip, ularning jem bolushini tosash bilen eyiblen'gen idi. Lékin kanada köngül bölidighan ishlarning ichide bu mesililerning bar - yoqluqi melum emes. 
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.