Xitay kopénhagén dunya klimat yighinigha buzghunchiliq qilghanliqini ret qildi
Muxbirimiz erkin
2009.12.23
2009.12.23
En'gliye "muhapizetchiler" géziti yéqinda maqale élan qilip, xitayni kopénhagén dunya klimat yighinini görüge éliwélish bilen tenqidligen. Xitayning bu qétimqi yighinda her qaysi ellerning yer shari hawa klimat özgirishini tizginleydighan konkrét kélishim hasil qilishigha tosqunluq qilghanliqi ilgiri sürülgen idi.
Lékin, xitay tashqi ishlar bayanatchisi jyang yüy, tereqqi qilghan döletlerni eyiblep, tereqqi qilghan döletlerning kopénhagén yighinidiki ipadisi yaxshi bolmighanliqini, ularning öz wediside turmighanliqini bildürgen. Xitay tashqi ishlar ministirlikining tünügünki axbarat élan qilish yighinida tereqqi qilghan döletlerning tereqqi qiliwatqan döletlerni tenqidlesh salahiyiti yoqliqini tekitligen jyang yüy, " ular özining qilmishi üstide oylinishi kérek" dégen.
"Muhapizetchiler" gézitining xewer qilishiche, en'gliye klimat mesililiri ministiri éd miliband xitayni kopénhagéndiki yighinda tereplerning hawa klimat özgirishini tizginleshke da'ir ikki türlük konkrét kélishim hasil qilishigha tosqunluq qilish bilen eyiblep, xitay we uning qollighuchilirini yighinni "görüge éliwélish" bilen tenqidligen idi.
Jyang yüy milibandning ismini ashkare tilgha almighan, lékin xitaygha qaritilghan tenqidni bezi rehberlerning öz mes'uliyitidin qéchish üchün otturigha qoyghan "siyasi neyringi" dep tekitligen. Xitay dunyadiki karbon 4 - oksidni hawagha eng köp qoyup béridighan dölet bolsimu, lékin tereqqi qilghan döletlerning köprek mes'uliyetni üstige élishini telep qilmaqta.