Iqtisadiy krizis weziyitide, xitay atalmish 'üch xil küchler' ge qarita téximu küchlük sezgürlük ipadilimekte

Uyghur éli uchur torliridin ashkarilishiche, 5 - 6 - mart künliri Uyghur élidiki jama'et xewpsizlik idare bashliqliri yighini échilghan bolup, yighin'gha Uyghur élidiki 15 wilayet we sheher saqchi idare bashliqliri qatnashqan. Yighinda, jama'et xewpsizlik nazaritining bashliqi, Uyghur élining bundin kéyinki muqimliq xizmiti we jama'et xewpsizlik da'irilirining wezipisi heqqide toxtilip " xelq'araliq iqtisadiy krizis weziyitide Uyghur élining muqimliqni qoghdash yenimu küchlük riqabetke duch kéliwatidu" dep otturigha qoyghan.

U yene Uyghur éli chégrisi ichidiki "üch xil küchlerning özgirishchan buzghunchiliq taktika pilanlirini aldin bayqap, qattiq zerbe bérish" kéreklikini alahide tekitligen.

Xewerdin melum bolushiche Uyghur aptonum rayonluq jama'et xewpsizlik nazariti,xitaydiki iqtisadiy dawalghushning tesiride Uyghur élidimu ijtima'iy dawalghushlarning muqimsizliq amillirini peyda qiliwatqanliqi, bolupmu atalmish "üch xil küchler"ning weziyettin paydilinip buzghunchiliq élip bérish üchün heriket qiliwatqanliqining ipadiliri körüwatqanliqini otturigha qoyghan bolsimu, buninggha da'ir éniq pakit körsitelmigen, peqet 1 - ayda awat hemde lop nahiyiliride qanunsiz diniy mektep achqan orundiki yigirme nechche kishining qolgha élin'ghanliqini körsitip, xitay da'irilirining Uyghur élide yéqindin buyanqi üch xil küchlerge qarshi herikitining netijisi süpitide misal alghan.

Uyghur élidin kelgen inkaslargha qarighanda, xitay da'iriliri Uyghur élide muqimliqni saqlash bahanisida Uyghurlarni kontrol qilishni, bolupmu musulmanlarning diniy pa'aliyetlirige qarita kontrolluqni yenimu kücheytken bolup hetta qeshqer qatarliq bezi jaylarda Uyghurlarning saqal burut qoyishiningmu cheklen'genliki melum.