Хитай шәрқий деңизда һәрбий маневир өткүзди

Җүмә күни хитай деңиз армийисиниң шәрқий деңиз пилоти вә деңиз назарәт оргини қатарлиқ орунлар һәрбий маневир өткүзди.
Мухбиримиз үмидвар
2012.10.21

Хитай ташқи ишлар министирлиқи мәзкур һәрбий маневир һәққидә изаһат берип, сенкаку араллириға мунасивәтлик талаш-тартишларға пүтүнләй японийә тәрәпниң мәсулийити барлиқини тәкитлиди.

Бирләшмә агентлиқниң хәвәр қилишичә, хитай тәрәп бу қетимқи һәрбий маневирниң дөләт земин пүтүнлүк вә деңиз һоқуқини қоғдашқа қаритилғанлиқини әскәртти.

Бу қетимқи маневирға 11 парахот, 8 һәр хил типтики айропилан һәмдә 1000 дин артуқ һәрбий хадим қатнашқан. Бу сенкаку арили кризиси күчәйгәндин буян хитайниң тунҗи қетим көп сандики әскири күчини ишқа селип һәрбий маневир өткүзүши һесаблинидикән. Шәнбә күни америка деңиз армийиси җәнубий деңизға “ георги вашингтон” намлиқ авиаматкисини әвәткән.

Шәнбә күни японийиниң хитайдики баш әлчиси сенкаку арили мәсилисини тездин һәл қилмиғанда икки дөләт мунасивәтлириниң техиму начарлишип кетидиғанлиқини агаһландурған.

Фирансийә агентлиқиниң хәвәр қилишичә, йәкшәнбә күни японийә қутқузуш хадимлири 20-өктәбир күни японийә деңиз тәвәликидә от апитигә учриған хитай йүк парахотини қутқузушқа қатнишип, 64 җуңгулуқни қутулдурувалған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.