Хитай мудапиә министирлиқи америкини икки қирғақ мунасивитигә тәсир йәткүзмәслик һәққидә агаһландурди

Хитай мудапиә министирлиқи пәйшәнбә күни баянат елан қилип, америкини хитай вә тәйвәндин ибарәт икки қирғақниң мунасивитигә дәхли йәткүзмәслик һәққидә агаһландурди.
Мухбиримиз ирадә
2010-02-25
Share

Бирләшмә агентлиқиниң хәвәр қилишичә, хитай мудапиә министирлиқиниң баянатчиси хуаң шөпиң пәйшәнбә күни мухбирларға бәргән баянатида, америкиниң тәйвәнгә қорал сетип бериш арқилиқ хитайниң дөләт бихәтәрликигә еғир тәһдит пәйда қилғанлиқини илгири сүргән. У сөзидә америкиниң бу һәрикитиниң америка - хитай мунасивәтлиригә еғир зиян селип, тәйвән арилиниң муқимлиқиға зиян әкәлгәнликини, шуңа хитайниң америка - хитай һәрбий сөһбитини тохтитишни қарар қилғанлиқини вә бу мәйданида өзгириш болмиғанлиқини билдүргән.

Йеқинда америка дөләт мудапиә министирлиқи -- пәнтаган елан қилған доклатта, хитайниң һәрбий күчини қаттиқ тәрәққи қилдурғанлиқидин тәйвән билән хитай арисида һәрбий күч җәһәттә зор пәрқ келип чиққанлиқини доклат қилған иди.
 
Доклаттин кейин ройтерс агентлиқи тәйвәнниң америкидин ф-16 типлиқ күрәшчи айропилан сетивалмақчи болғанлиқини хәвәр қилған иди. Хитай мудапиә министирлиқиниң баянатчиси хуаң шөпиң сөзидә бу һәқтиму тохтилип, өзлириниң мәзкур доклатниму йеқиндин тәқип қиливатқанлиқини билдүргән вә америкиниң бундин кейин сөз вә һәрикәтлиригә диққәт қилип, икки қирғақ мунасивити вә униң тинч тәрәққий қилишиға дәхли қилмаслиқи керәкликини агаһландурған.

Америка - хитай мунасивити америкиниң тәйвәнгә 6 милярд 400 милйон долларлиқ қорал - ярақ сетип беришни қарар қилиши сәвәбидин йириклишип, хитай америка билән һәрбий алақини тохтитидиғанлиқини вә тәйвәнгә қорал - ярақ сатқан америка карханилириға имбарго қоюшни ойлишидиғанлиқини елан қилған иди.
 
Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт