Xitay mudapi'e ministirliqi amérikini ikki qirghaq munasiwitige tesir yetküzmeslik heqqide agahlandurdi

Xitay mudapi'e ministirliqi peyshenbe küni bayanat élan qilip, amérikini xitay we teywendin ibaret ikki qirghaqning munasiwitige dexli yetküzmeslik heqqide agahlandurdi.
Muxbirimiz irade
2010-02-25
Élxet
Pikir
Share
Print

Birleshme agéntliqining xewer qilishiche, xitay mudapi'e ministirliqining bayanatchisi xu'ang shöping peyshenbe küni muxbirlargha bergen bayanatida, amérikining teywen'ge qoral sétip bérish arqiliq xitayning dölet bixeterlikige éghir tehdit peyda qilghanliqini ilgiri sürgen. U sözide amérikining bu herikitining amérika - xitay munasiwetlirige éghir ziyan sélip, teywen arilining muqimliqigha ziyan ekelgenlikini, shunga xitayning amérika - xitay herbiy söhbitini toxtitishni qarar qilghanliqini we bu meydanida özgirish bolmighanliqini bildürgen.

Yéqinda amérika dölet mudapi'e ministirliqi -- pentagan élan qilghan doklatta, xitayning herbiy küchini qattiq tereqqi qildurghanliqidin teywen bilen xitay arisida herbiy küch jehette zor perq kélip chiqqanliqini doklat qilghan idi.
 
Doklattin kéyin roytérs agéntliqi teywenning amérikidin f-16 tipliq küreshchi ayropilan sétiwalmaqchi bolghanliqini xewer qilghan idi. Xitay mudapi'e ministirliqining bayanatchisi xu'ang shöping sözide bu heqtimu toxtilip, özlirining mezkur doklatnimu yéqindin teqip qiliwatqanliqini bildürgen we amérikining bundin kéyin söz we heriketlirige diqqet qilip, ikki qirghaq munasiwiti we uning tinch tereqqiy qilishigha dexli qilmasliqi kéreklikini agahlandurghan.

Amérika - xitay munasiwiti amérikining teywen'ge 6 milyard 400 milyon dollarliq qoral - yaraq sétip bérishni qarar qilishi sewebidin yirikliship, xitay amérika bilen herbiy alaqini toxtitidighanliqini we teywen'ge qoral - yaraq satqan amérika karxanilirigha imbargo qoyushni oylishidighanliqini élan qilghan idi.
 
Toluq bet