Хитай бир мутәхәссисни җасуслуқ билән әйибләп өлүм җазасиға һөкүм қилғанлиқтин тәнқидкә учриди
Мухбиримиз әркин
2008.11.28
2008.11.28
Бу йил 59 яшлардики ву вейхәнниң австирийә тәвәликидики қизи чен рән, дадисиға берилгән өлүм җазасиниң җүмә күни әтигәндә иҗра қилинғанлиқини, хитай даирилириниң дадисини өлүм җазасидин кәчүрүп қелиш һәққидики өтүнишигә қулақ салмиғанлиқини, өзиниң хитай адаләт сестимисидин үмидсизләнгәнликини билдүргән. Америкиниң бейҗиңдики әлчиханиси ву вейхәнниң җазаси иҗра қилинғанлиқини айдиңлаштуруп, өлүм җазасини шиддәтлик әйибләйдиған баянат елан қилди.
Америка әлчиханисиниң баянатчиси сузан стевенсон мундақ дәйду": биз хитай һөкүмитиниң ву вейхәнгә берилгән өлүм җазасини иҗра қилғанлиқидин наһайити қаттиқ чөчидуқ вә үмидсизләндуқ." Ву вейхән хитай пуқраси болуп, у илгири бир мәзгил авистирийидә яшиған, 2005 - йили тәйвәнгә ахбарат йәткүзүш билән әйиблинип қолға елинған иди.
Ву вейхәнниң қизи чен рән, әйибнамисидә дадисиға артилған җинайәтләрниң бири хитай рәһбәрлириниң саламәтлик әһвалиға аит мәхпийәтликни ашкарилиған болуши мумкин, дегән пәрәзгә таянғанлиқини билдүргән. Ву вейхәнниң дилоси дуня җамаәтчиликиниң диққитини қозғиған болуп, мәзкур дилоға австирийә президенти хейниз фишир, америка ташқи ишлар министири кандилиза райис қатарлиқлар арилашқан вә хитай даирилириниң ву вейхәнни кәчүрүм қилишини тәләп қилған иди.
Австирийә ташқи ишлар министири урсила пласник җүмә күни бу вәқәни явропа иттипақиға қаритилған "алдинала пиланланған қилтақ", дәп тәнқид қилди. У мундақ дәйду": униң өлүм җазасиниң хитай - явропа кишилик һоқуқ сөһбити өткүзүлидиған күнниң алдиға тоғрилиниши кишилик иззәт - һөрмәтниң йоқлуқини, бу делониң бир тәрәп қилиниш усулидики қопаллиқни намайән қилмақта."
Лекин хитай ташқий ишлар министирлиқи баянатчиси чин гаң өлүм җазасини ақлап, ву вейхәнниң хитай қанунини бузғанлиқини, униң "чәтәллик уруқ - туғқанлирини, дәп алаһидә имтияз берилмәйдиғанлиқи"ни билдүргән.