Amérikidiki aliy mekteplerge kelgen xitay oqughuchilarning yérimidin köpining saxtiliq qilghanliqi ashkarilandi

Roytérsning xewer qilishiche, amérikidiki aliy mekteplerde oqush üchün SAT we ACT qatarliq imtihanlargha qatnashqan chet'ellik oqughuchilarda, bolupmu xitaydin kelgen oqughuchilarda éghir saxtiliq ehwalliri bayqalghan. Imtihan bergüchining qeghezdiki nomuri bilen amérikigha kelgendin kéyinki emeliy ehwali arisida zor perq körülüshtek bu ehwalning nurghun qétim tekrarlinishi alaqidar da'irilerni heriketke keltürgen.

Igilinishiche, amérikigha kélidighan chet'ellik oqughuchilar eng köp xitay we hindistandin ibaret ikki dölettin kélidiken. Yuqiridiki bashqarmining tekshürüp éniqlishi netijiside, xitaydin amérikigha kelgen oqughuchilarning yérimidin köprekining imtihanda saxtipezlik ishletkenliki ashkarilan'ghan.

Bu xitay oqughuchilar amérikining imtihanda resimlik kimlik tekshürmeydighan yochuqidin paydilinip, bashqa birini özining ornigha imtihan bergüzgen yaki yalghan matériyal hazirlighan. Netijide in'gliz tilini sinaq qilidighan toffél imtihanida intayin yuqiri nomur alghan oqughuchilarning amérikigha kelgendin kéyin bolsa emeliyette bir éghizmu in'glizche gep qilalmaydighanliqi ashkarilan'ghan.

Nöwette amérika da'iriliri bu xil ehwalni eng az sewiyige chüshürüsh üchün imtihan meydanida resim tartish, kimlik tekshürüshke oxshash bir qatar tedbirlerni élishni oylashmaqta. Emma ular bu tedbirlerning saxtipezliklerni omumyüzlük tosup qalalaydighanliqidin yenila ümidsiz.