خىتاي - پاكىستان ئالاھىدە ھەرىكەت قىسىملىرى پەنجاب شتاتىدا ش ت ئى ھەرىكىتىگە ھۇجۇم قىلىش مانېۋىرى ئېلىپ بارغان

خىتاي - پاكىستان ئالاھىدە ھەرىكەت قىسىملىرى پەيشەنبە كۈنى پەنجاب شتاتىدا شەرقىي تۈركىستان ئىسلام ھەرىكىتى قوراللىق كۈچلىرىنىڭ مەخپىي يوشۇرۇنغان جايى ۋە لاگېرىغا ھۇجۇم قىلىش مانېۋىرى ئېلىپ بارغان. پەيشەنبە كۈنكى مانېۋىر ئىككى دۆلەت قوراللىق قىسىملىرىنىڭ ئالدىنقى دۈشەنبە باشلانغان ۋە پاكىستان قەبىلىلەر رايونىدىكى شەرقىي تۈركىستان قوراللىق جىھادى كۈچلىرىنى نىشان قىلغان ئاتالمىش «تېررورلۇققا» قارشى بىرلەشمە ھەربىي مانېۋىرىنىڭ بىر قىسمى. پەيشەنبە كۈنكى مانېۋىردا ئىككى دۆلەت ئالاھىدە قىسىملىرى تىكئۇچار ۋە ئاپتوماتىك قوراللار بىلەن كېلىپ، ش ت ئى ھەرىكىتىنىڭ يوشۇرۇنغان جايى ۋە لاگېرىغا ھۇجۇم قىلىشنى مەشىق قىلغان.
مۇخبىرىمىز ئەركىن
2011-11-25
ئېلخەت
پىكىر
Share
پرىنت

مانېۋىرغا ئىككى تەرەپتىن 500 دەك ئەسكەر قاتناشقان. بۇ بەزى ئانالىزچىلاردا پاكىستان بىلەن خىتاي ۋەزىرىستاندىكى شەرقىي تۈركىستان جىھادى قوراللىق كۈچلىرىگە قارشى بىرلەشمە ھەربىي ھەرىكەت ئېلىپ بېرىشنى پىلانلاۋاتامدۇ - قانداق، دېگەن گۇمان قوزغىغان.

بىراق خەۋەرلەردە پاكىستان دائىرىلىرىنىڭ خىتاي بىلەن بىرلەشمە ھەربىي مانېۋىر ئېلىپ بېرىشتىن سىرت، ئۇنىڭ بىلەن بىرلىشىپ پاكىستان تېررىتورىيىسىدىكى ش ت ئى ھەرىكىتى كۈچلىرىگە قارشى رەسمىي ھەربىي ھەرىكەت ئېلىپ بېرىش ئېھتىماللىقىنى رەت قىلغانلىقى ئىلگىرى سۈرۈلگەن.

بۇ ھەقتىكى خەۋەرلەردە پەيشەنبە كۈنكى مانېۋىرغا پاكىستان ئارمىيىسىنىڭ باش شتاب باشلىقى، گېنېرال ئاشفاق پەرۋەز كايانى ۋە خىتاي ئازادلىق ئارمىيىسى مۇئاۋىن باش شتاب باشلىقى خو شۇسەننىڭ قاتناشقانلىقى بىلدۈرۈلدى. كايانى ئاخبارات ساھەسىگە ئەسكەرتىپ، «بىز شەرقىي تۈركىستان ئىسلام ھەرىكىتىدىن ئىبارەت بۇ تەھدىتنى يوقىتىش ئۈچۈن ئەڭ زور تىرىشچانلىقىمىزنى كۆرسەتتۇق. بىز ناھايىتى زىچ ھەمكارلىق ئېلىپ باردۇق ۋە ئىستىخبارات ئالماشتۇردۇق» دېگەن. لېكىن، ئۇ قانداق ھەمكارلىق ئېلىپ بارغانلىقى، قانداق ئىستىخبارت ئالماشتۇرغانلىقى ھەققىدە تەپسىلىي توختالمىغان. پاكىستان ھۆكۈمىتى ئىلگىرى نۇرغۇن ئۇيغۇر مۇساپىرلىرىنى تۇتۇپ، خىتايغا ئۆتكۈزۈپ بەرگەن. ئۇنىڭ بۇ ھەرىكىتى خەلقئارا كىشىلىك ھوقۇق ئورگانلىرى ۋە ئۇيغۇر تەشكىلاتلىرىنىڭ قاتتىق تەنقىدىگە ئۇچرىغان ئىدى.
پىكىرلەر (0)
Share
تولۇق بەت