Xitay - pakistan alahide heriket qisimliri penjab shtatida sh t i herikitige hujum qilish manéwiri élip barghan

Xitay - pakistan alahide heriket qisimliri peyshenbe küni penjab shtatida sherqiy türkistan islam herikiti qoralliq küchlirining mexpiy yoshurun'ghan jayi we lagérigha hujum qilish manéwiri élip barghan. Peyshenbe künki manéwir ikki dölet qoralliq qisimlirining aldinqi düshenbe bashlan'ghan we pakistan qebililer rayonidiki sherqiy türkistan qoralliq jihadi küchlirini nishan qilghan atalmish “Térrorluqqa” qarshi birleshme herbiy manéwirining bir qismi. Peyshenbe künki manéwirda ikki dölet alahide qisimliri tik'uchar we aptomatik qorallar bilen kélip, sh t i herikitining yoshurun'ghan jayi we lagérigha hujum qilishni meshiq qilghan.
Muxbirimiz erkin
2011.11.25
Share on WhatsApp
Share on WhatsApp

Manéwirgha ikki tereptin 500 dek esker qatnashqan. Bu bezi analizchilarda pakistan bilen xitay weziristandiki sherqiy türkistan jihadi qoralliq küchlirige qarshi birleshme herbiy heriket élip bérishni pilanlawatamdu - qandaq, dégen guman qozghighan.

Biraq xewerlerde pakistan da'irilirining xitay bilen birleshme herbiy manéwir élip bérishtin sirt, uning bilen birliship pakistan térritoriyisidiki sh t i herikiti küchlirige qarshi resmiy herbiy heriket élip bérish éhtimalliqini ret qilghanliqi ilgiri sürülgen.

Bu heqtiki xewerlerde peyshenbe künki manéwirgha pakistan armiyisining bash shtab bashliqi, général ashfaq perwez kayani we xitay azadliq armiyisi mu'awin bash shtab bashliqi xo shusenning qatnashqanliqi bildürüldi. Kayani axbarat sahesige eskertip, “Biz sherqiy türkistan islam herikitidin ibaret bu tehditni yoqitish üchün eng zor tirishchanliqimizni körsettuq. Biz nahayiti zich hemkarliq élip barduq we istixbarat almashturduq” dégen. Lékin, u qandaq hemkarliq élip barghanliqi, qandaq istixbart almashturghanliqi heqqide tepsiliy toxtalmighan. Pakistan hökümiti ilgiri nurghun Uyghur musapirlirini tutup, xitaygha ötküzüp bergen. Uning bu herikiti xelq'ara kishilik hoquq organliri we Uyghur teshkilatlirining qattiq tenqidige uchrighan idi.
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.