Хитайда йәнә башланғуч мәктәпкә бастуруп кирип, оқуғучиларни пичақлаш вәқәси йүз бәрди

Бир киши җүмә күни хитайниң сәндуң өлкиси веифаң шәһиридики бир башланғуч мәктәпкә бастуруп кирип, тәйярлиқ синип оқуғучилиридин 5 балини болқа билән уруп зәхмиләндүргәндин кейин, өзигә от қоюп өлүвалған. Бу һәқтики хәвәрләрдә, вәқәниң шаңҗуаң башланғуч мәктипидә йүз бәргәнликини, яриланған оқуғучиларниң әһвали еғир икәнликини билдүрмәктә.
Мухбиримиз әркин
2010.04.30

Вәқә садир қилғучи 45 яшлардики ваң юңләй исимлик бир деһқан болуп, у икки оқуғучини тутувелип, өзи билән тәң көйдүрмәкчи болған, лекин оқуғучилар оқутқучилири тәрипидин қутқузувелинған. Бу хитайда 3‏ -айниң 23‏ - күнидин бери башланғуч мәктәп оқуғучилирини пичақлап өлтүрүш яки зәхмиләндүрүш вәқәсиниң 5 ‏ - қетим йүз беришидур.

Буниңдин бир күн бурун хитайниң җяңши өлкиси тәйшиң шәһиридә 46 яшлардики бир басмихана игиси шу җайдики бир башланғуч мәктәпкә бесип кирип, 29 оқуғучи, икки оқутқучи вә бир нәпәр аманлиқ хадимини пичақлап зәхимләндүргән иди. Мәзкур вәқә хитай һөкүмити 1‏ - майда ечилидиған шаңхәй хәлқара йәрмәнкисини баһанә қилип, мәмликәтниң һәр қайси җайлирида бихәтәрликни күчәйткән мәзгилдә йүз бәрди.

Хәвәрләргә қариғанда, хитай маарип министирлиқи мутәхәссисләр гурупписи қуруп, мәктәп қорусини һуҗумдин қандақ қоғдаш мәсилисини музакирә қилишқа башлиған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.