Xitay Uyghur élini xelq puli arqiliq chégra halqighan meblegh sélish sinaq rayoni qilghanliqini jakarlidi

Shinxu'a agéntliqining xewer qilishiche, bu xitayning xelq puli bilen meblegh sélish raschotini tunji qétim sinaq qilishi bolup, Uyghur élide bu xil meblegh sélishni sinaq qilidiken.

Murasim jüme küni ürümchide élip bérilghan bolup, murasimni Uyghur aptonom rayonluq hökümet we xitay xelq bankisi birlikte uyushturghan.
 
Xewerde neqil élip körsitishiche, murasimda söz qilghan xitay xelq bankisining mu'awin bashliqi xu shawlyen, buning "shinjangning qoshna eller bilen bolghan iqtisadiy munasiwetlirini ilgiri sürüsh we meblegh salghuchi shirketlerni xeterdin saqlap qélishni meqset qilidighanliqi" ni körsetken.

Xuning bildürüshiche, xelq puli arqiliq meblegh sélish dégenlik, xelq'araliq soda we meblegh sélishta xitay pulini ishlitish dégendin ibaret bolup, bundaq bolghanda chet'el puqraliri biwasite xitay pulida hésabat achalaydiken.

Xewerge qarighanda, bezi xitay sodigerliri dollar we yawro qimmitining chüshüsh hadisisi chet'elge meblegh salghan xitay shirketlirini ziyan'gha uchratqanliqini, eger xitay puli bilen biwasite meblegh sélinsa, bu xitay shirketliri üchün paydiliq ikenlikini bildürüshken.

Buning Uyghur élining yerlik xelqlirige qandaq menpe'et élip kélidighanliqi hazirche namelum.

Xitay hökümiti jüme küni, Uyghur élini xelq puli arqiliq chégra halqighan meblegh sélish türlirini raschot qilish sinaq rayoni qilghanliqini jakarlidi.