بۇ قېتىمقى ئۆستۈرۈشتە دەي سۇجۈن خىتاي قوراللىق قىسىمىنىڭ مۇئاۋىن شىتاپ باشلىقى، چى باۋۋېن بولسا، قوراللىق قىسىم شىنجاڭ ئەترىتىنىڭ باش قوماندانى بولۇپ تەيىنلەنگەن. 5 - ئىيۇل ئۈرۈمچى نامايىشىنى باستۇرغان قوماندانلارنىڭ ئۆستۈرۈلۈشى بۈگۈنكى خەلقئارا خەۋەرلەردە كەڭ - كۆلەمدە ئورۇن ئالدى. خەۋەرلەردە خىتاينىڭ بۇ ئارقىلىق 5 - ئىيۇل نامايىشىنى باستۇرغانلارنى مۇكاپاتلىغانلىقى ئەسكەرتىلدى.
بۈگۈن دۇنيا ئۇيغۇر قۇرۇلتىيىنىڭ باياناتچىسى دىلشات رىشىت بۇ ھەقتە سۆز قىلىپ، خىتاينى " 5 - ئىيۇل ۋەقەسىنىڭ قاتىللىرىنى ئۆستۈردى" دەپ ئەيىبلىدى. دىلشات رىشىت يەنە "ئەگەر خىتاي بىر قانۇن دۆلىتى بولغان بولسا، بۇ ئۆستۈرۈلگەن كىشىلەر، ئەسلىدە بۈگۈن سوتقا تارتىلغان بولاتتى؛ خىتاي ئۆزىنىڭ زوراۋان تەبىئىتىنى يەنە بىر قېتىم ئاشكارىلىدى،" دەپ تەنقىد قىلدى.