Xitay bilen rusiye b d t xewpsizlik kéngishining süriyini tenqid qilish qararini maqullishigha tosqunluq qildi

Xitay bilen rusiye xewpsizlik kéngishining qararlirini ret qilish hoquqigha ige bolup, ular yighinda kéngeshning süriyini tenqid qilish qarari maqullishigha qarshi turidighanliqini bildürgen.

Xewpsizlik kéngishining süriye weziyitige munasiwetlik jüme künki pewqul'adde yighini bezi yawropa döletlirining we shundaqla amérika, yaponiye, jenubiy koriye qatarliq ellerning teklipige bina'en chaqirghan. Xitay, süriyining mesilini di'alog arqiliq hel qilishi kéreklikini tekitligen.

Amérika teripidin otturigha qoyulghan qarar layihiside süriye da'irilirining namayishchilarni qirghin qilghanliqi, tutqun qilghanliqi we kemsitkenliki tenqid qilinip qalmay, yene, xelq'ara tekshürüsh ömiki ewetip, süriye hökümitining zorawanliqini tekshürüsh telep qilin'ghan idi.

Xelq'ara axbarat wasitilirining jüme künki xewerliride bayan qilishiche, shu küni süriyining dara, demeshq qatarliq sheherliride xelq ammisi jüme namizidin kéyin namayish qilip, beshér esedning texttin chüshüshini telep qilghan. Lékin süriye hökümiti herbiy qisimlarni ishqa sélip namayishchilarni basturghan.

Xewerlerde kishilik hoquq teshkilatlirining melumati neqil keltürülüp, shu küni 42 adem ölgenliki, lékin ölgen adem sanining yene köpiyish éhtimali barliqi ilgiri sürülgen. Kishilik hoquq teshkilatliri süriyide xelq namayishi partlighandin buyan ölgen adem sani 400 din ashidighanliqini bildürmekte.