خىتاي ۋە رۇسىيە تاجىكىستاندا ھەربىي مانېۋىر باشلىدى

مەزكۇر مانىۋېر ئۆتكۈزۈلۈشتىن سەل بۇرۇن خىتاي پاكىستان دائىرىلىرىدىن قەبىلىلەر رايونىدىكى شەرقىي تۈركىستان كۈچلىرىگە ھەربىي ھەرىكەت قوللىنىشنى تەلەپ قىلىپ، ئۇلارنىڭ خىتايغا ھۇجۇم قىلىشنى پىلانلاۋاتقانلىقىنى ئىلگىرى سۈرگەن.
 
فرانسىيە ئاگېنتلىقىنىڭ خەۋەر قىلىشىچە، تاجىكىستان دۆلەت مۇداپىئە مىنىستىرلىكى باياناتچىسى مامادئالىيېۋ مانېۋىر ھەققىدە توختىلىپ،" مانېۋىر مۇناسىۋەتلىك دۆلەتلەرنىڭ تېررورىزمغا قارشى تۇرۇش ھەرىكەتلىرىدىكى ئۆز ئارا ماسلىشىشچانلىقنى ئۆستۈرۈش، خەلقئارا تېررورىزمغا قارشى تەييارلىق كۆرۈشنى مەقسەت قىلىدىغانلىقىنى" بىلدۈرگەن.

مانېۋرنىڭ ئەڭ مۇھىم قىسىمى شەنبە كۈنى فەخرىئاباد ھەربىي بازىسىدا ئۆتكۈزۈلىدىغان بولۇپ، مانېۋىرغا مىڭدىن ئارتۇق ئەسكەر قاتناشماقتا ئىكەن. تاجىكىستان ئوتتۇرا ئاسىيادىكى ئىستراتېگىيىلىك ئەھمىيىتى ئىنتايىن مۇھىم دۆلەت. قىرغىزىستان يېقىندا بىشكەكتىكى ئامېرىكا ھەربىي بازىسىنى چېكىندۈرۈپ چىقىپ كېتىشنى تەلەپ قىلغاندىن كېيىن، ئامېرىكا تاجىكىستاندا بازا قۇرۇش مۇمكىنچىلىكىنىڭ بار - يوقلىقىنى سۈرۈشتۈرگەن ئىدى.