Xitay rusiyining irkutski shehiride konsulxana achti

Xitay téxi yéqindila rusiyining ottura qismidiki yékatirinaburg shehiride konsulxana achqan bolsa, jüme küni rusiyining jenubiy sibiriye rayonidiki muhim sana'et we soda - iqtisad shehiri irkutski shehiride konsulxana achqan.

Perghane agéntliqining bu heqte bashqa menbelerdin neqil élip körsitishiche, échilish murasimida irkutski ölkisining bashliqi we xitayning moskwadiki bash elchisi soz qilghan. Irkutskdiki xitay konsulxanisining bashliqi gu omin sözide mezkur konsulxanining échilishining rusiye - xitay munasiwetliridiki zor weqe ikenliki shuningdek buning rusiye bilen xitayning diplomatik munasiwet ornatqanliqining 60 yilliqi üchün bir sowgha ikenlikini körsetken.

Nöwette, rusiyining béyjing, shangxey, xarbin qatarliq bir qanche sheherliride konsulxaniliri bar bolup, bularning hemmisi asasen dégüdek sabiq sowét ittipaqi bilen xitayning diplomatik munasiwet ornatqan dewride meydan'gha kelgen. Sabiq sowét ittipaqi eyni waqitta Uyghur élining ürümchi, ghulja, qeshqer, chöchek qatarliq sheherliride konsulxana tesis qilghan bolup, sowét ittipaqining Uyghur élidiki konsulxaniliri 60 - yillarda ikki dölet munasiwetliri buzulghanda taqalghan idi.

Hazir, Uyghur aptonom rayoni bilen rusiyining ottura we jenubiy sibiriye rayonliri arisidiki soda - iqtisad hem medeniyet alaqilirining kéngiyiwatqanliqi melum bolsimu, lékin rusiyining ürümchidiki konsulxanisining eslige keltürülüsh - keltürülmesliki heqqide uchur yoq.