Хитай сақчилири атуш шоруқлуқ имам сәләйни тутуш үчүн атушта омумйүзлүк өй ахтуруш елип барған

Радио аңлиғучилиримиздин бири өткән һәптә учур йоллап, атушниң шоруқ дегән мәһәллисидә бир түркүм яшларниң тутқун қилинғанлиқини мәлум қилған, хитайниң атуштики сақчилири болса мәзкур вәқәниң растлиқини инкар қилған.
Мухбиримиз шөһрәт һошур
2012.11.09

Уйғур елидин чәтәлгә йеңи чиққан бир уйғурниң радиомизға бүгүн билдүрүшичә, хитай сақчилири өткән айниң оттурилири атушта омумйүзлүк өй ахтуруш елип барған; сақчилар өй ахтуруш давамида 24 яшлиқ гумандар имам сәләй һәққидә мәлумат игилигән вә униң из-дерикини қилған.

Мәлум болушичә, имам сәләй 1-өктәбир күни қәшқәр қағилиқта йүз бәргән һәрбий газармиға мотсиклитлиқ партлитиш һуҗуми вәқәсигә четишлиқ дәп қарилип қара тизимликкә киргүзүлгән. Ашкарилинишичә, имам сәләй атуш шоруқтин болуп, у 5-июл вәқәсидин кейин һидайәт йолини тапқан, иман-етиқадлиқ вә җәмийәттә тәсири бар яшлардин икән.

Инкаслардин мәлум болушичә, хитай сақчилири өткән айда шоруқтики өй ахтурушлири давамида 20 гә йеқин яшни тутқун қилған. Тутқунлар партлатқуч материялларни сақлаш гумани билән сорақ қилинған. Әмма тутқунларниң кейинки әһвали вә имам сәләйниң тутулған-тутулмиғанлиқи һазирчә мәлум әмәс.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.